Loahpaheigga Uleåborgas
Gonagasbárra loahpahii stáhtaguossástallama davvin Suomas – Uleåborgas, gos earet eará stuora Nokia kommunikašuvdnahoiddus lea fabrihkka. Teknologiija ja dearvvašvuohta lea otná áššin.
Go leaba guossástallan guokte beaivvi Helssegis, de jotkkiiga Majestehtaguovttos Gonagas ja Dronnet iežaska stáhtaguossástallan mátkki davásguvlui, Uleåborgii, gos guossástallan loahpahuvvui. Doppe lei gávpoga universitehta bajimusas Gonagasbára agendas.
Innovašuvdna Uleåborg universitehtas
Uleåborg universitehtas lea našuvnnalaš ovddasvástádus fállat oahpu sámegielas ja kultuvrras, ja Gonagasbárra beasai gullat Giellagas-instituhta Tellus Innovation Arena birra odne. Arena lea guovdu universitehtabáikki, ja fállá lanjaid ja reaidduid mat galget movttiidahttit ja láhčit dili innovašuvdnii.
Gonagasbárra beasai gullat sihke ”Business Kitchen” ja ”Arctic Business Corridor” birra– dat leat doaimmat gos gründarat sáhttet oažžut doarjaga duohtandahkat iežaset áigumušaid ja oažžut álggahanveahki. Stuorát doaimmat sáhtte oažžut ávkki universitehta fágačehppodagain go galget iežaset doaimmaid viiddidit internašuvnnalaš dássái.
Gonagas Harald beasai maid sáddet dieđu KNL- fierpmádagain – mii lea molssaevttolaš gulahallanfierpmádat mii doaibmá dábálaš eanastašuvnnaid haga. Dat dahká sihkkareabbon johtit meara alde, váriin ja duoddariin ja eará báikkiin gos sáhttá leat váttis gulahallat dábálaš mobiltelefuvnnain dahje gos ii oba leat ge mobiila oktavuohta.
Lunša ráđđeviesus
Ollu mánát ledje boahtán leavggaiguin ja liđiiguin Dronnet Sonjaid go Gonagasbárra bođii ráđđevissui lunšii. Sártnistis namuhii Gonagas ahte son ovddoša buot dan maid lea oaidnán universitehtas ja sávai ahte sii lihkostuvaše ovttasbargguin norgga fitnodagaiguin ja institušuvnnaiguin:
The visit at the university has left us impressed. Your large student population, your high quality research, and your strong business culture is very promising for the future.
You are building strong connections with Northern Norway in particular. The Queen and I wish you well. We are since long taken in by Northern Norway ourselves. We believe that you will find eager and competent partners there.
Nokia
Birrasii jagis 2000 lei Nokia máilmmi stuorámus mobiltelefuvdna ráhkadeaddji. Dál leat sii njunnošis neahttasiskkáldas struktuvrraid, kárta - ja posišuvdnaservice suorggis. Gonagasbárra beasai maid gullat Nokia historjjá odne, ja dasa lassin oahpistedje ja čájehedje sudnuide maid fabrihkalanjaid.
Muhto maiddái norgga fitnodagat besse čájehit iežaset doaimmaid Gonagassii ja Dronnegii. Soai beasaiga gullat aitto álggahuvvon Troandin Voico birra, mii bargá kánturbáikkiid riejaid geahpedemiin, Nordic Semiconductor birra, mii dál lea ásaheamen dutkan - ja ovddidanossodaga Uleåborgii, ja Tieto, mii bargá dearvvašvuođateknologiijain sihke Norggas ja Suomas.
Uleåborga universitehtabuohcciviessu
Stáhtaguossástallama maŋemus guossástallanbáiki lei Uleåborga universitehtabuohcciviessu, mii lea okta Suoma stuorámus buohcciviesuin. Doppe muitaledje Gonagassii ja Dronnegii Oulu Health birra – mii lea ”ekosystema” mii čohkke akademiija, almmolaš ja priváhta suorggi teknologiija ovddideapmái ja dan várás ahte gávnnahit čovdosiid mat leat buoremusat pasieanttaide, dearvvašvuođa ásahusaide ja ealáhusaide.
Gonagasbárra beasai maid dearvvahit norgga ja suoma fitnodagaid mat leat spesialiseren iežaset dearvvašvuhtii guoskevaš teknologiijas: Polar Electro (kábelkeahtes váibmomonitoreren), Eyelife (kábelkeahtes ultrajietna) ja Peili Vision (gaming bokte giellaterapiija lášmmodahttin).
Nie loahpaheigga Gonagas Harald ja Dronnet Sonja iežaska stáhtaguossástallama Suomas. Gonagasbáras ja ealáhusaid ovddasteddjiid delegašuvnnas, mii sudno čuovui, leamaš ollu doaimmat prográmmas dien golbma beaivvi.