Nobel ráfibálkkašupmi 2010

Ráfibálkášupmi juhkkojuvvo Liu Xiaoboai su guhkes ja ii-veahkaválddálaš ráhčamušaid vuođđudeaddji olmmošvuoigatvuođaid ovddas Kiinnás.

Bálkkášumi vuoiti čohkká giddagasas Kiinnás, ja nu ii sáhttán ge boahtit vuostáiváldit bálkkašumi. Ii lean oktage eará ge boahtán vuostáiváldimis bálkkašumi Liu Xiaobo ovddas. Guoros stuollu lei bálkkašumi vuoiti sajis lávdde nalde ávvodoaluid oktavuođas.

Meanut

Lávlu Marita Kvarving Søberg álggahii otná meanuid Edvard Griega Solveig nammasaš lávlagiin, man pianočuojaheaddji Håvard Gimse lea hápmen.

Nobellávdegotti jođiheaddji, Torbjørn Jagland, ságastalai ja čilgii manin sii leat válljen Liu Xiaobo dán jagi ráfibálkášumi vuostáiváldin. Jagland loahpahii sáhkavuorus ja govvidii bálkkašumi geigema go son bijai medállja ja diploma guoros stuolu nala mas Liu Xiaobo livččii galgan čohkkat.

Ameriika-kiinna fijuvlačuojaheaddji Lynn Chang čuojahii.

"I have no enemies"

Liv Ullmann logai Liu Xiaobo iežas čállojuvvon sániid, su bealuštussártni "I have no enemies". Sártni čállojuvvui ja ovddiduvvui 2009 čakčamánu 23.beaivvi, dikkis mas son guokte beaivvi maŋŋil dupmejuvvui 11 jahkái giddagasas čohkkat. Den norske opera & ballett mánáidkoarra loahpahi meanuid dáru árbemusihkain.

Riepmomállásat

Odne eahkes searvaba Gonagas Harald ja Dronnet Sonja árbevirolaš riepmomállásiidda Grand Hoteallas Oslos. Ihttin eahkes Gonagas maiddái searvá nobelkonsertii Oslo Spektrumas.