Dieđáhusat
Lottiid áicama bargobájit sámegielat mánáide
Lottiid áicama bargobájit sámegielat mánáide
Almmustahtton 19.5.2017
Meahciráđđehus lea ordnen sámegielat loddebargobájiid Anáris, Vuohčus ja Roavvenjárggas. Ikte bargobájit ledje Roavvenjárgga davvisámegielat giellabeasis ja Sahanperä beaiveruovttu sámegielat joavkkus. Lottiid áicama bargobajit gullet Lappi loddevahkkui, mii fas lea oassin Suopma100-dáhpáhusain.
Loddebargobájiin árabajásgeassinahkásaš ja vuolleskuvlla sámegielat mánát besse oahpásmuvvat lottiid váldoáššiide ja dasa, maid lottiid áican ja dárkon gáibida. Lottiid áicama sáhttá álggahit vaikke iežas šilljobirrasis ja maidige earenoamáš rusttegiid ii dárbbaš skáhppot, deháleamos gaskaoamit leat juohkehaččas, namalassii lottiid áicamis lea buorre johttit cakkas čalmmiiguin ja beljiiguin. Kirsi Ukkonen luondduguovddáš Siiddas ja Pentti Pieski konsearnadieđiheamis ordniiga Roavvenjárgga bargobájiid, mat dollojuvvojedje sihke anáraš- ja davvisámegillii.
- Lottit bokte máŋggaid mánáid beroštumi ja lei somá fuobmát, ahte gal gávpotsámemánáidege luondu lea dehálaš ja maiddái dábálaš oassi eallimis. Luonddugaskavuohta lea dehálaš oassi sámekultuvrras, ja eandalii gávpotguovlluin dan rolla stuorru ain. Meahciráđđehus lea ordnen ovddit jagiid máŋggaid luonddubajásgeassindáhpáhusaid ja -leairraid sámegielat mánáide ja mihttomearri lea joatkit dán doaimma, dadjá sámegielat dieđiheaddji Pentti Pieski.
Spesiálaplánejeaddji Kirsi Ukkonen Luondduguovddáš Siiddas finai vahku álggus juo anárašgiela giellabesiin, ja fitná boahtte vahkus Anára beaivedivššus ja maŋimuš skuvlavahkus Anára vuolleskuvlla. Plánejeaddji Kristiina Aikio Dávgevári luondduguovddážis lea doallan sullasaš bargobájiid Vuohčus. Loddebargobádji lea plánejuvvon dollot maiddái Helssega sámegielat árabajásgeassima mánáide.
Lassidieđut:
Spesiálaplánejeaddji Kirsi Ukkonen, Meahciráđđehus, tel. 0400 479 986, špoasta: kirsi.ukkonen(at)metsa.fi
Sámegielat dieđiheaddji Pentti Pieski, Meahciráđđehus, tel. 040 7696 109, špoasta : pentti.pieski(at)metsa.fi
Govvateaksta: Sahanperä beaiveruovttu sámegielat joavkku mánát čuovvumin loddebargobáji. Govas spesiálaplánejeaddji Kirsi Ukkonen muitala lotti eará osiin. Govva: Pentti Pieski
Dieđáhusat