Dieđáhusat
Meahciráđđehusa kulturárbeinventeren bálkkašuvvui Europa Nostra sierramáinnašumiin
Meahciráđđehusa kulturárbeinventeren bálkkašuvvui Europa Nostra sierramáinnašumiin
Almmustahtton 15.5.2017
Stáhta máŋggageavahanvuvddiin jagiin 2010-2015 ollašuhtton kulturárbeinventerenfidnu lea ožžon Europa Nostra duopmárjoavkku mieđihan sierramáinnašumi. Sierramáinnašumiin bálkkašit fidnuid, mat leat veahkehan ja buoridan eurohpálaš kulturárbbi seailuma. Dovddastus juhkkojuvvui 15.5. Turkus ordnejuvvon kulturárbbi European Heritage Congress -stuorradáhpáhusas.
Meahciráđđehusa stáhta mehciid kulturárbeinventeren bálkkašuvvui dutkamuš-kategoriijas. Europa Nostra duopmárjoavku muitalii ákkastallamiin spiehkastatlágan viiddis ja gokčevaš fidnu sihke ovttastan eará kulturárbbi doaibmiid ja veahkehan dahkat šalddi luonddu ja kulturárbbi gaskii.
- Leat duođaid ilus dán dovddastusas. Fidnu lei Suoma ja Eurohpá mihttolávas spiehkastatlágan ii dušše dan sturrodaga dáfus, muhto maiddái dan dihtii, ahte inventeremis kártejedje áiggi dáfus čuozáhagaid gitta measta otná beaivvi rádjai, dadjá fidnus spesiálaplánejeaddjin doaibman Hanna Kelola-Mäkeläinen.
Kulturárbeinventeremiin dokumenterejedje ja suodjaledje stáhta máŋggageavahanvuvddiin badjel 10 000 kulturárbečuozáhaga, mat sisttisdolle badjel 100 000 ovttaskas ráhkadusa. Áiggi beales čuozáhagaid kártejedje measta 10 000 jagi áiggis - gitta áramus Suoma ásaheaddjiid luottain 1950-60-loguid gávpotluvvama mielde ávdimin šaddan dáluide.
- Máŋggageavahanvuvddiid kulturárbi dovdojuvvo dál duođaid bures. Inventeremiid mielde stáhta vuvddiin maiddái nuorat, lagamustá 1900-lohkui áiggi beales sajuštuvvon, kulturárbbi seailun lea dorvvastuvvon, muitala suvdilis ovdáneami oaivámuš Antti Otsamo Meahciráđđehusa Vuovdedoallu OS:s
Inventeren čohkkii issoras stuorra meari rabas materiála, mii dahká vejolažžan kulturárbečuozáhagaid ávkkástallama nu turismma ovddideamis go oahpahusas ja dutkamušas. Inventerenraporttat lea buohkaid oažžumis Meahciráđđehusa siidduin ja govat leat vurkejuvvon Metsämuseo Lusto Kantapuu.fi -bálvalussii. Inventeremis dahke maiddái nuvttá e-girjji, mii sihke oahpásmahttá dárkileappot fidnu bohtosiidda ja sisttisdoallá máŋggageavahanvuvddiid vánddardančuozáhagaid.
Ekonomiijaanus lean vuvddiid sihke guorba- ja joavdelaseatnamiid inventerejedje fidnu áigge oktiibuot measta njeallje miljon hektára. Inventerema oppalašgolut ledje sulaid njeallje miljon euro ja ruhtadeamis vástidii Meahciráđđehus vuovdedoallu (dál Meahciráđđehusa Vuovdedoallu Os).
Europa Nostra lea jagi 1963 vuođđuduvvon eurohpálaš kulturárbbi gáhttejeaddji organisašuvdna, mii doaibmá badjel 50 riikkas. Organisašuvdna lea juohkán jagi 2002 rájes Eurohpá uniovnna ja Europa Nostra oktasaš kulturbálkkašumiid. Dán jagi duopmárjoavkku mieđihan sierramáinnašumi ožžo 13 fidnu 11 Eurohpá riikkas. Meahciráđđehusa kulturárbeinventerenfidnu lea áidna sierramáinnašumi ožžon suopmelaš bálkkašupmeevttohas. Europa Nostra -bálkkašumiin bálkkašuvvui Suomas Paavo Nurmi Legacy -fidnu.
Fidnu neahttasiiddut: http://www.metsa.fi/metsiinkadonneet
Fidnu blogga: http://kulttuuriperintoinventointi.blogspot.fi
Inventerenraporttat: https://www.metsa.fi/inventointiraportit
Fidnu govat: http://www.kantapuu.fi
Mehciide láhppon e-girji: http://www.e-julkaisu.fi/metsahallitus/metsiin_kadonneet
Lassidieđut:
Doeđiheaddji Hanna Kelola-Mäkeläinen, tel. 040 180 4592, hanna.kelola-makelainen@metsa.fi
Suvdilis ovdáneami oaivámuš Antti Otsamo, Meahciráđđehusa vuovdedoallu Os, tel. 040 719 7734, antti.otsamo@metsa.fi
Dieđáhusat