Aili oaččui ávvuruđa man NSR evttohii 2010:s
Aili Keskitalo oaččui odne ávvuruđa mii lea buvttaduvvon sámi 100-jagi ávvudeami, Tråante 2017, oktavuođas. Lei sámediggeáirras Gunn-Britt Retter guhte 2010:s evttohii sámi ávvuruđa.
Sámedikki vuosttaš nissonlaš presideanta, dál NSR presideantaevttohas, Aili Keskitalo oaččui gudni vuostáiváldit johttimintta man Norges Bank odne almmustahtii ja geigii.
Ávvuruhta lea 20-ruvdnosaš johttiminta mas lea sámi hábmen man govvadáiddár Annelise Josefsen, guhte lea mearrasámi gilážis Jáhkovuonas eret, lea dahkan.
– Lea vuosttaš geardi go norgga ruđas lea sámi dáidda, ja lea juoga man mii atnit árvvus, dajai Keskitalo Sámedikki bealis go son sárdnidii Sámi ja Norgga almmolaš ovddasteddjiide.
– Govva “vuorrováikkuhus” gudnejahttá min historjjá ja sin guđet gálle bálgá sámi vuoigatvuođaide, mielmearrideapmái ja demokratiijii, muitalii Keskitalo.
NSR evttohus 2010:s
Jo 2010:s evttohii Gunn-Britt Retter ahte galggai ráhkaduvvot ruhta ávvudeami oktavuođas. Son niegadii bábirruđa birra mas lei Elsa Laula Renberg govva, muhto evttohii molssaeaktun ahte sáhtášii maid leat 20-ruvdnominta.
– Lea somá oaidnit ahte muhttin ráje dain buriid jurdagiin maid olmmoš hutká čađahuvvojit. Mun jáhkán dál, nu go jáhkken dalle go evttohin, ahte sáhttá leat mielde čalmmustahttit ávvudeami ja oalgguhit ságastallamiidda min historjjá birra, dadjá Retter odne.
