Birasdirektoráhta bálkesta birasberoštumiid merrii
Maŋebargga bekkii ahte Birasdirektoráhta dohkkeha Nussir ASA ohcama beassat ruvkebázáhusaid luoitit Riehpovutnii. Norgga Sámiid Riikkasearvvi jođiheaddji Beaska Niillas fuolastuvvá ođđasii, ja cealká ahte NSR áigu bargat buot mii leš vejolaš bissehan dihtii dán luondduveahkaváldima ja dálá ealáhusaid ja riekteguddiid duolbmuma.
– Mii oaidnit ahte eat leat áidna joavku main dákkár áigumušat, ja lea ge dákkár áššiin main dárbbašat govda searvama, oktavuođaid ja nanu njunnoža. Vaikko vel ođas ii lean áibbas vuordetmeahttun, de leamaš aŋkke smávva doaivva ahte eiseveldit galge jierpmálaš árvvoštallama dahkat, dadjá NSR jođiheaddji.
– Lea áibbas dohkketmeahttun ahte sámi beroštumit ja luondu álo gártá máksit divrasepmosit go stuorraservodat ja ealáhusberoštumit galget dárbbuideaset gokčat. Ja vaikko leat ge eará ásahusat, dego áhpedutkaninstituhtta ja Sámediggi, garrasit moaitán Nussira ákkastallamiid de eai daga diehtin ge. Sáhttá jearrat leago šat obanassiige dárbu Birasdirektorahtii go jo sii aŋkke orrot čuovvumin ráđđuhusa ealáhusáigumušaid, beroškeahttá birasváikkuhusaid, joatká Beaska.
Dohkketmeahttun
Beaska Niillas lei meara alde suohppumin liinna go gulai ođđasa. Son lea ieš guolásteaddji ja ballá ge makkár váikkuhusaid ruvkeásaheapmi sáhttá buktit su ealáhussii.
– Dákkár birasuhkideaddji industriijaásaheapmi gal sáhttá agálaš vahágiid dahkat, ja ribahit goaridit ja jávkadit bistevaš ealáhusaid dego boazodoalu ja guolásteami. Jus álget biebmat guliid mirkkoin de mii gal gal jođánit massit iežamet luohtámuša ja buori beaggima máilbmes. Dál han mii buvttadat guovtti máilmmi buhtámus ja dearvaslaččamus biebmuin, sihke guolásteaddjit ja badjeolbmot, váruha NSR-jođiheaddji.
Servodatváikkuhusat
– Eai go leat vel oahppan? Geahča mat mo Mátta-Várjjagis dál manai, ruhtavátnivuohta dagahii ahte eai jurddašan go beaivves beaivái, rogge buot mii lei rogganveara ja jávistedje eará málbmaguovlluid. ja nu oanidedje máŋga jagi doaimma. Dán dahke go ruhta dat lea mii stivrre, ii fal guhkesáiggi jurddašeapmi ja servodatberoštupmi. Dál lea doppe fas bargguhisvuohta, báhcán lea máŋgga milliardasaš rehket ja nášunala luossavuotna lea devdojuvvon ruvkebázáhusaiguin, beaškala Beaska Niillas.
Guoddala mearrádusa Dálkkádat ja birasdepartementii
Sámedikkeráđilahttu Silje Karine Muotka lea jo dieđihan ahte Sámediggi guoddala mearrádusa Dálkkádat ja birasdepartementii. Dalle ášši manná ráđđehussii váiddameannudeapmái.
– Dát mearrádus eahpikeahttá rihkku álgoálbmotrivttiid. Dáid rivttiid lea Norga gaskariikkalaččat iežas geatnegahttán čuovvut. In ge mun ádde mo birasdirektoráhta lea nagodan dáid hilgut. Dat hilgot olmmošvuoigatvuođaid. Riekteguoddit galget beassat friija, ovddalgihtii miehtama addit ovdal makkárge doaibma sáhttá álggahuvvot. Norga ferte dál čuovvugoahtit ONa Álgoálbmotjulggaštusa. NSR vuoruha bistevaš, birasgáhttejeaddji ealáhusaid ja vuhtii váldá luonddu ja luonddu geavaheddjiid. Dás mii orrotleamen ruossolassii eiseváldiiguin, loahpaha Beaska Niillas.
