Boazodoallopolitihkka lávke ain guhkkelii eret
Eanandoallo- ja biebmodepartemeanta almmuhii odne stuoradiggedieđáhusa boazodoalu ceavzilvuođa birra, Boazodoallu — Guhkes árbevierru — erenoamáš vejolašvuođat (Reindrift— Lang tradisjon – unike muligheter). Dieđáhusas boahtá ovdan ahte eai leat olahan ovttaoaivilvuođa NBR:in ja Sámedikkiin dehálaš čuoggáid dáfus.
– Lean beahtahallan, muhto ii lean vuordemeahttun ahte vuosttaš Ovddádusbellodat-ministtar gii almmuha stuoradiggedieđáhusa boazodoalu birra, nu viidát vállje hilgut NBR ja Sámedikki árvalusaid máhttovuođu ja vuoruhuvvon čuolmmaid hárrái, dadjá Sámedikki kultur- ja ealáhuslávdegotti lahttu, Silje Karine Muotka NSR bealis. – Dat mearkkaša ahte boazodoallopolitihkka lávke ain guhkkelii eret árbevirolaš sámi boazodoalus.
Sámediggeáirras Silje Karine Muotka
Dieđáhusa fokus bohccuid geatnegahtton indiviidamerkemii ja boazologu bearráigehččui čájeha makkár ovttabealat váldečađaheami ráđđehus láhčá ealáhusa dáfus. NSR muittuha ahte EBD lea vuoittáhallan boazologu bággounnideami áššis guovtti riekteinstánssas, ja ahte berreše dál vuhtii váldit ahte dás sáhttet šaddat váikkuhusat. Dál leat rievdadan osiid boazodoallolágas §60 ja stuoradiggedieđáhusas evttohit rievdadit sihke ulbmilparagráfa ja §18 boazologu dieđiheami birra, ja maiddái hálddašeami boazodoallostivrra ektui. Dalle lea ágga jearrat manne ráđđehus ii doahttal NBR ja Sámedikki gáibádusa ođasmahttit ja ollislaččat geahčadit boazodoallolága.
NSR šálloša go EBD ja ministtar ain jotket njeaidit sámi váikkuheami boazodoallohálddašeamis, seammás go čiehkádit doahpagiid duohkái nu go álkidahttin ja beavttálmahttin. Stuoradiggedieđáhus ákkastallá garrasit dan ovdii ahte heaittihit boazodoallostivrra.
– Dasa lassin jáhkán ahte olu boazodoallit beahtahallet dainna go boazodoalu ja eanandoalu dásseárvu divatgažaldagas ii čovdojuvvo dán dieđáhusas. Čujuhuvvo bušeahttabargui, muhto eai addojuvvo makkárge lohpádusat, vaikko leat ge bohciidahttán vuordámušaid ráđđehusjulggaštusa bokte, joatká Silje Karine Muotka
