Bovde bellodagaid searvat oktasaš cealkámuššii
Ruoŧa Sámediggi lea nagodan buktit oktasaš cealkámuša mineráladoaimmaid vuostá Sámis. Dáhpáhusat Gállogis leat suorggahan sihke Ruoŧa ja Norgga bealde, ja dasto Aili Keskitalo lea dál bovden daid eará bellodagaid hábmet oktasaš cealkámuša maiddái Norgga Sámedikkis.
Lei bloggačállosis NRK Sápmi neahtasiiduin gos Aili Keskitalo vuos almmuhii bovdejumi oktasaš cealkámuššii. Son oaivvilda dat sáhttá leat veahkkin buoridit Sámedikki luohttámuša sámi álbmogis Norgga bealde.
Aili Keskitalo mener det vil bidra til å skape tillit i den samiske befolkningen om Sametinget klarer å samle seg rundt en tydelig gruvepolitikk.
– Ruoŧa Sámediggi lea nagodan soahpat buktit oktasaš cealkámuša ruvkedoaimmaid vuostá sámi guovlluin daid lágaid vuođul mat gávdnojit. Mun bovden dál daid eará bellodagaid Sámedikkis dahkat dan seamma, lohká NSR jođiheaddji ja presideantaevttohas Aili Keskitalo.
Presideantaevttohas evttoha ahte Sámediggi dál loahpaha ja rádjá eret daid intenšuvdnasoahpamušaid maid lea soahpan ruvkefitnodagaiguin, ja álggaha barggu ođđasit.
– Čoahkkaneatnot dál minerálaáššis ja čájeheatnot ealáhusdepartementii ja Stuoradiggái ahte mii eat dohkket minerálalága mii ii vuhtiiváldde árbevirolaš vuoigatvuođadolliid ja sin rievtti mielmearrideapmái áššiin mat gusket areálageavaheapmái, lohká son.
NSR lea suorganan dáhpáhusaiguin Gállokis. Sii leat maiddái oaidnán ahte eanandoallodepartemeanta lea cealkán Nussir-prošeavtta leat vahágin boazodollui. Danne evttohit sii dál ahte Sámediggi ferte leat čoahkis rievttes beale dán áššis.
– Mii fertet nannet gáibádusaid ahte minerálaroggan ii sáhte boahtit ja duvdit eret sámi vuođđoealáhusaid. Gildot fal ruvkedoaimmaid sámi guovlluin nu guhká go vuoigatvuođadolliin ii leat vuoigatvuohta dadjat maiddái ii fal šiehtadallamiid oktavuođas. Jus ii beasa dadjat ii fal, de eai oainnat gávdno duohta šiehtadallamat, loahpaha presideantaevttohas.
