Buerie båateme Plassjese!
Čakčamánu 4.-6. beivviid lágiduvvo Norgga Sámiid Riikkasearvvi luohttevašolbmokonferánsa Plassjes. Váldofáddá 2015 konferánssas lea min guovlluid hálddašeapmi.
Luohttevašolbmokonferánsa lea konferánsa gos don dego luohttevašolbmon beasat gullat mo luohttevašvuođadoaimmat doibmet, deaivat eará luohttevašolbmuid NSRas, ja leat mielde bidjat vuođu NSRa boahttevaš jagiid politihkkii.
Beaska Niillas
– Go jurddašan 2015ii konferánssa fáttá de lea mu mielas lunddolaš dan lágidit mátta-Sámi guovllus. Fitnen duvle geassemánus Gaelpies. Doppe lea NVE addán huksenlobi bieggamilloide, guovdu Voengelh-Njaarke og Åarjel-Njaarke orohagaid eadnamiid. Lea oalle čielggas ahte sámi hálddašeapmi ii vuhtiiváldojuvvo dálá almmolaš hálddašeamis, dadjá NSR jođiheaddji Beaska Niillas.
Báikenamain Finnmárkkuopmodahkii
Dán jagá prográmmain dáhttut čuvgehit earret eará mo min eadnamat ja čázit leat vuođđun min gielaide ja min kultuvrii, erehosaid gaskal sámi ja dáža riekteáddejumiid, ja erohusaid gaskal sámi ja dáža hálddašeami obbalaččat.
– Manne lea nu garra vuosteháhku sámegillii ja sámi báikenamaide – leatgo dihtomielalaš vai eahpedihtomielalaš guottut? FeFo ja Finnmárkkuláhka – mii lei dalle jurdda ja šattai go nu mo leimmet jurddašan? Sáhttá go oktage oamastit eadnamiid ja čáziid, vai leatgo dat luoikkasin? Galgat go oamastit vai hálddašit? Dát leat dušše muhton ovdamearkkat gažaldagaide maid háliidat jearrat miellahttuideametguin ja luohttevašolbmoideametguin, ja leat vuordámušat šaddat gelddolaš digaštallamat ja vástádusat, loahpaha Beaska Niillas.
