Bušeahttabargu – ovttasbargu ja ovddasfástádus
Mannán vahkku bálkestuvvui NSR Sámedikki jođiheamis. Dát lei hirpmástuhtti sihke NSR:i ja máŋgasiidda sámi servvodagas.
Bušeahtameannudeapmi ja eahpeluohttámušjienasteapmi orui midjiide guhkit áigge plánejuvvon, ja ággan fámostallamii ledje ovddalgihtii hutkojuvvon sierramielalašvuođat. NSR diehtá ahte jođiheapmái ferte luohttámuša tinet. 2013:s adde válljejeaddjit luohttámuša midjiide. Válljejeddjiid duomu maŋŋá leat mii iskan šiehtadit ja boahtit ovttaoaivilvuhtii politihkalaš guimmiiguin ja vuostáleddjiiguin Sámedikkis.
Sámedikkis leamašan govda ovttaoaivilvuohta mo bušeahta buoremusat gálggašii šiehtadallat, ja NSR lea dáhkan seamma láhkai dán jagi go diibmá. Mii leat dáhkan nugo eará joavkkut leat háliidan: 1) sámediggeráđđi bidjá ovdan iežas evttohusa, 2) opposišuvdna buktá iežas vuoruhemiid lávdegottečoahkkimis, 3) šiehtadallo lávdegottis ja vejolaččat maŋŋá. Máŋga bellodaga, ee. Bargiidbellodat, leat čielgasat cealkán ahte eai hálit buktit evttohusaid ovdal go Sámediggeráđđi ovdanbuktá iežas bušeahttaevttohusa. Sivvan dása lea ahte háliidit ovddidit iežaset politihka ja čalmmustahttit dan formálalaš evttohusaid ja šiehtadallamiid bokte. NSR lea gudnijahttán dan, nu dán ge háve.
Maŋimuš bušeahtagieđahallamis lea NSR váldán oktavuođa opposišuvdnabellodagain ovttasbarggu birra sihke ovdal lávdegottevahkku, lávdegottevahkkus ja vahkku gaskal lávdegottečoahkkimiid ja dievasčoahkkima. Leamašan oktavuohta sihke e-poastta ja telefovnna bokte, lávdegottis ja njálmmálaš sagastallamiin. Ledje unnán bellodagat mat fástidedje njuolga, ja Frp lei áidna opposišuvdnabellodat mii buvttii evttohusa lávdegottis. NSR vásihii ahte earát garve ja maŋidedje lávdegottemeannudeami.
Eanaš oassi Bargiidbellodaga, Olgeža ja Árjja bušeahtas lea hui ovttalágan NSR:a bušeahtain. Ođđa posišuvdnabellodagat leat dadjan ahte bušeahtta galggai leat ođđa geaidnu Sámediggái. Mii eat oainne daid stuorra rievdadusaid. Dál maŋŋá bohtet álelassii ođđa čilgejumit mii lei duogáš eahpeluohttámuššii. Čilgejumit rievddadallet, ja sadjásaš ákkastallamat čujuha dan guvlui ahte dát lei maŋásbargi proseassa. Telefončoahkkin mii, min dieđuid mielde, galgá dáhpáhuvvan vuossárgga dievasčoahkkinvahkkus, ja gos eahpeluohttámuš digaštallui nanne dán. Čoahkkin dáhpáhuvai guokte beaivvi ovdal go Bargiidbellodat, Olgeš ja Árjá bukte iežaset bušeahttaevttohusa.
Duorastaga gárttai NSR:a sámediggeráđđi guođđit iežas doaimma eahpeluohttámušjienasteami maŋŋá. NSR vuordá ahte buohkat dolles áššálaš dási digaštallamis. NSR gudnejahttá Sámedikki eanetlogu ja dohkkeha ahte lea ođđa jođiheapmi Sámedikkis. Mii doaivut ahte dát proseassa ii bilidivčče Sámedikki beaggima, ja mii vuordit ahte ođđa posišuvdna bargášii vuosttildit dán. Mii áigut dál bargat ovddidan dihte iežamet politihkka ja sámi servvodaga.
