Háliidit muittašit oažžun dihte jurdagiid ávvudeapmái
IBSS (Iinna ja biras sámiid searvi / Hinnøy og omegn sameforening) deavdá 40 jagi 2017:s. Danne áigut sii čohkket sihke boares ja ođđa miellahtuid albma muittašanboddui lávvardaga ođđajagimánu 16. b. vai ožžot evttohusaid mo jorbabeaivi galgá ávvuduvvot.
– IBSS lea leamaš dehálaš sihke politihkalaččat ja kultuvrralaččat guovllu sámevuhtii. Searvvis lei erenoamáš dehálaš rolla sámi nuppástuhttináiggis 70-logu loahpageahčen ja 80-logu álggogeahčen, ja mii sáhttit dál čoaggit daid murjjiid bealdduin maid dalle leat gilván, dadjá Runar Myrnes Balto.
Searvi háliida ávvudit dán historjjá 2017:s, ja mii bivdit veahki sis guđet leat leamaš mielde daid iešguđetge áigodagain dán 40-jagi. Sii váldet áinnas vuostá muitalusaid, dokumeanttaid ja govaid maid áŋgiruššit leat vurken.
– Sámediggepresideanta hálai ofelaččaid birra ođđajagisártnistis. IBSS historjjás leat ollu vearditmeahttun ofelačča, ja mii háliidat sin ovdandoallat ávvudeami oktavuođas, dadjá Myrnes Balto.
40 jagi čađa dáhpáhuvvá ollu buorre searveeallimis, muhto IBSS oaivvilda maiddá ahte lea miellagiddevaš vilppastit ruovttoluotta dehálaš nuppástusaide historjjás.
– Mun maiddá dieđán ahte leat máŋga sihke somás, dramáhtalaš ja miellagiddevaš muitalusa máŋgga áigodagas IBSS doaimmas. Mii háliidat áinnas muittašit buot daid, ja árvvoštallat ahte sáhttet go dat leat inspirašuvdnan ávvudeapmái 2017:s, dadjá Myrnes Balto.
Jurddabádji lea Vuomi giliviesus dii. 14.00 lávvardaga ođđajagimánu 16. b.
Oktavuođadieđut: IBSS nubbinjođiheaddji Runar Myrnes Balto, telefovdnanr 977 73 778, e-poasta: runar.balto@gmail.com
