Heahtenummaris galgá sáhttit sámástit
– Jo, de lea dehálaš ahte Sámediggi bargá dearvvašvuođaáššiiguin, dadjá Aili Keskitalo guhte lea Norgga Sámiid Riikasearvvi (NSR) presideantaevttohas Sámediggeválgii. – Jus oktage du birrasis buohcá ja don fertet riŋget heahtenummarii, berre dus leat vejolašvuohta oažžut vástádusa sámegillii. Dá leat áššit mainna Sámediggi ferte bargat, dadjá Keskitalo.
– Mii háliidat dahkat šiehtadusaid etáhtaiguin mat stivrejit heahtenummariid ahte ferte gávdnot bistevaš sámegielat fálaldat. Lea sáhka sihkarvuođas. Máŋgasiidda sáhttá leat mearrideaddji sáhttit gulahallat iežas gillii heahtedilis, dadjá Keskitalo.
Keskitalo oaivvilda ahte vaikke ii oktage bellodat Sámedikkis dáhtu váldit badjelasas dearvvašvuođafálaldaga, de leat ollu áššit mainna Sámediggi berre bargat politihkalaččat dearvvašvuođasuorggis.
– Čoavddasátni lea váldit oktavuođa dearvvašvuođaásahusaiguin sámegillii. Lea earret eará danne mii lullisámi válgabiires evttohat sámi pasieantagulahallanolbmo St. Olavs hospitalii. Lea maiddá danne mii áigut bargat dan ovdii ahte mánát geain lea oktavuohta mánáidsuodjalusain, biepmoruovttuiguin ja mánáidruovttuiguin galget beassat bisuhit iežaset sámi kultuvrra ja giela. Dá leat moadde ovdamearkka mat čájehit poeŋga; de vissá lea dehálaš ahte mii bargat dearvvašvuođaáššiiguin Sámedikkis, loahpaha presideantaevttohas.
