Keskitalo: Sara vuoitu lea sámi vuoitu
– Go Jovsset Ánte Sara vuoitá guoddalanášši stáda vuostá de lea dat lávki ovddasguvlui sámi rivttiid dáfus, go dá lea stuorát ášši go dušše jearaldat boazolohkugeahpedeamis, dadjá NSR presideantaevttohas Aili Keskitalo preassadieđahusas.
Guoddalanáššis gaskal Jovsset Ánte Sara ja stáda vuittii Sara vel oktii. Duomus daddjo ahte stáda gáibádus Sarai njuovvat bohccuid vai báhcet 75 heakka rihkku artihkal 27 ON-konvenšuvnna siviila ja politihkalaš vuoigatvuođaid birra. Nuppiin sániin de mearkkaša dat ahte stádas ii leat lohpi bágget badjeolbmo jođihit doalus vuolláibáhcagiin, go dat duohtavuođas mearkkaša ahte badjeolmmoš hehttejuvvo doaimmahit iežas kultuvrra.
– Háliidan giitit Jovsset Ánte go guoddá dán lossa noađi dan bokte ahte vuodjela dán ášši stáda vuostá. Lea ovttaskas áššiin main sápmelaččat riektesálain vuosttildit vearrivuođaid ahte mii duođaid beassat duođaštit ja geahččalit iežamet rivttiid álbmogin, ja mun jáhkán mii galgat ráhkkanahttit iežamet ahte dá šaddá dehálaš bargovuohki midjiide jagiin ovddasguvlui oažžun dihte mieđiheami sámi rivttiide, dadjá Keskitalo.
Glimt fra rettssaken i Hålogaland lagmannsrett.
Norggas lea konvenšuvdna siviila ja politihkalaš vuoigatvuođaid birra sajáiduhtton olmmošvuoigatvuođaláhkii, ja galgá deattuhuvvot eanet go eará lágat go lea vuostálasvuohta. Maŋimuš jagiid leat oaidnán ahte konvenšuvnna artihkal 27 leamaš čilgehussan bissehit bieggafápmorusttegiid boazodoalloguovlluin.
– Guovtti dáin áššiin dovddan bures dan áiggis go ledjen sámediggepresideantan. Sihke Fálesráššas ja Gaelpies lihkostuvve orohagat bissehit bieggafápmoplánaid artihkal 27:in vuođus. Ahte riekti dál čujuha dáid áššiide mearkkaša ahte mii dál leat vihtanat dasa ahte sámi vuoigatvuođat eai dušše gávdno báhpáriin, muhto ahte dain lea praktihkalaš mearkkašupmi maid, dadjá Keskitalo.
– Seammás diehtit ahte sápmelaččat miehtá Sámi ain rahčet ja fertejit boahtteáiggis maid rahčat iežaset vuoigatvuođaid ovdii beassat doaimmahit iežas kultuvrra. Maiddá Jovsset Ánte Sara sáhttá šaddat rahčat viidásat jus stáda guoddala ášši. Dalle fertet mii sámepolitihkkárat nagodit doarjut ovttaskas sápmelaččaid geat rahčet iežaset vuoigatvuođaid ovddas, loahpaha Keskitalo.
