Listhaug ferte jorgalit!
Otná ráđđehus vásiha garra vuostehágu Norgga eanandoalus dán jagáš eanandoallošiehtadeami oktavuođas. Ja ii leat imaš ahte dálkkáskišgoahtá boaittobealde báikkiin Norggas, go politihkka man áigut čađahit ii leat ávkin eanandollui davvin man ge láhkai.
Eanandoallu lea guhká leamaš okta dain deháleamos ealáhusain sámi guovlluin. Smávva doalut eai leat dušše dehálaččat ealáhussan, muhto dat leat maid mielde bisuheamen sámi kultuvrra heakkas ja hábmejit ealli birrasiid gilážiidda. Sámi eanandoallu, ja maiddá eanandoallu davvin, vásihit jo stuorra hástalusaid sihke dainna mo eambbosiid oaččohit ealáhussii ja heaittihemiiguin.
Ahte eanandoalloministtar Sylvi Listhaug dál doaibmá bievvalin ii leat juoga man sáhttá dahkat almma fuomášuvvot. Lea čielggas ahte go váldá unnibuin, addin dihte stuorráide, de leat gilit Norggas vuovdiluvvan moatti jagi geahčen. Eanandoallu nu go mii dál dovdat dan, jávká ja lea dušše gávdnamis historjágirjjiin. Lea eanandoallu sámi guovlluin ja Davvi-Norggas masa dát čuohcá garrasepmosit, go eanaš dállodoalut leat unnit go gaskamearri muđuid riikkas.
Mo de šaddá sámi gilážiidda?
Mis ii sáhte leat eanandoalopolitihkka mii addá stuorráide ja váikkuha negatiivvalaččat unnibuidda, mii fertet baicce vuoruhit eanandoalu mii lea heivehuvvon dán riikii gos mii orrut, sihke geografiija ja kultuvrra dáfus. Mii fertet smiehttat boahtteáiggi birra, mo oaččohit nuoraid ealáhussii, ja seamma dehálaš lea čalmmustahttit man hearki ealáhus lea dálkkádatrievdamiidda.
NSR háliida ahte galgá leat vejolaš bargat eanandoaluin unnit skálas maiddá. Eanandoallu ferte nannejuvvot giliin, sihke eanandoallu okto ja ovttas eará ealáhusaiguin. Mii fertet deattuhit báikkálaš riggodagaid geavaheami ja ávkkástallama, ja ferte leat vejolaš doaimmahit gánnáhahtti ekologalaš eanandoalu.
Danne doarjut mii boanddaid stuimmiid fálaldaga vuostá eanandoalošiehtadusas. Ráđđehus ferte jorgalit, jus ii, de ferte Stuorradiggi čorget áššiid. Muđui lea riska ahte eanandoallu davvin fargga lea historjá.