– NBR lea dehálaš!
Norgga Sámiid Riikkasearvi oasálastá dán vahkku Norgga Boazosápmelaččaid Riikkasearvvi riikkačoahkkimis. Čoahkkin lea davvi-Trøndelagas dál geassemánu 12.-13. beivviid.
Ol Johan Gaup
Nora Marie Bransfjell
– NBR lea dehálaš searvi boazosámi servodahkii ja lea guovddáš vuojeheaddji boazosámi politihkkas Norgga bealde. Mii dárbbašat nanu organisašuvnnaid main lea mihttomearri ovddidit badjeolbmuid rivttiid ja eavttuid, dadjá NSRa jođiheaddji Beaska Niillas. Son doallá dearvvasáhkavuoru riikkačoahkkimis.
NSR riikkastivrraáirras Ol Johán Gaup ja Sámedikkeáirras Nora Bransfjell maid čuovvuba riikkačoahkkima.
– Min mielas lea dehálaš čuovvut bargguid ja šiehtadallamiid mat dahkkojit riikkačoahkkimis ja doalvut ságaid ruovttoluotta iežamet organisašuvdnii, dadjaba Gaup ja Bransfjell.
Norgga Sámiid Riikkasearvi sávvá Norgga Boazosápmelaččaid riikkasearvái lihkku riikkačoahkkiminaset ja sávvat buori ovttasbarggu gaskkal Sámi organisašuvnnaid ovddasguvlui.
-Ovttas mii leat gievrrabut, loahpaha Beaska.
