NSR vuittii Sámediggeskuvlaválgga

– Lean hui ilus go NSR lea stuorámus bellodat skuvlaválggain, dál jo goalmmát geardde, dadjá NSR-nuoraid jođiheaddji Piera Heaika Muotka dan oktavuođas ahte NSR vuittii dán jagi sámediggeskuvlaválgga.

Bohtosat čájehit ahte NSR lea stuorámus 20,1%, ja dan vuolábealde lea BB ja Olgeš.

– Dat čájeha fas ahte mii lea bellodat sámi nuoraid várás. Mis leat dat buoremus jurdagat sámenuoraide, ja daid mii leat nagodan gaskkustit skuvladigaštallamiin mat leat lágiduvvon, dadjá Muotka.

Son oaivvilda ahte sivva daid buriid bohtosiidda lea ahte NSR:as leat ollu nuorat sihke organisašuvnnas ja listtuin.

– Min ovdamunni lea ahte mis leat ollu nuorat geat áŋgiruššet politihkalaččat ja leat badjin min listtuin Sámediggeválgii. – Olusat sis sáhttet maid beassat Sámediggái, muitala Muotka.

Muhto son lea maid fuolastuvvan go skuvladigaštallamat máŋgga báikkis – nu go ovdamearkka dihte Álttás ja Kárášjogas – leat heaittihuvvon ja sadjái leat bidjan válgatoargga.
– Dat addá dáža bellodagaide čielga ovdamuni, go sin politihkka gaskkustuvvo našunála válgagičču bokte. – Skuvladigaštallamiid haga masset sámi bellodagat arena gos sáhttit gaskkustit iežamet politihka ja čájehit erohusaid bellodagaid gaskkas.

Son sávvá dál ahte rávisolbmot čuvvot nuoraid ovdamearkka. – Nuorat oidnet ahte čielga Sámediggi mii addá fálaldagaid lea buoremus Sápmái. Dál mii vuordit ahte rávisolbmot maid ipmirdit ahte lea áigi molsut Bargiidbellodat- ja Árja-ráđđenvuogi Sámedikkis, loahpaha Muotka.