Nuoraidkonferánsa: Sámi boahtteáigi
Golggotmánus beasat searvat nuoraidkonferánsii, NSR-riikačoahkkimii ja máilmmi čáffadeamos grafittibargobádjái! Searvva don ge!
NSR nuoraidlávdegoddi lágida sierra nuoraidkonferánsa NSRa 44. riikkačoahkkima oktavuođas, Álttás golggotmánu 7.-9. beivviid (mátkkoštanbeaivi golggotmánu guđát beaivvi). Sihke ođđa ja boares nuoraidmiellahtut leat buresboahtimat. Ale fal bala jos it leat ovdal leamaš riikkačoahkkimiin ja dovddat iežat nooban go lea sáhka resolušuvnnaid ja njuolggadusaid birra. Dál dus lea vejolašvuohta oahppat!
Nuoraidkonferánssa fáddá lea Sámi boahtteáigi. Movt hálidat DON ahte min boahtteáigi Sámis galgá leat? Movt DON hálidivččet váikkuhit min vejolašvuođaid bargguide ja eallinvugiide? Duojár dahje vuoktačuohppi, boazodoalli dahje rehketdoalli, guolásteaddji dahje doavttir? Dávjá digaštallojuvvojit hástalusat mat mis odne leat Sámis, ja dávjá vajálduvvojit buot vejolašvuođat mat mis leat. Sámis leat erenoamáš buorit vejolašvuođat kulturealáhusaide, turismii, duodjái, ja biebmobuvttadeapmái – buot dát lassin dábálaš ealáhusaide nugo guolásteapmi ja boazodoallu. Mis lea čuvges boahtteáigi! Prográmmas gávnnat ee. Sámediggepresideantta Aili Keskitalo ja gründárguoktá Lars Theodor Kintel (oassálasti Agenda Davvi-Norgga ambassadevrajoavkkus) ja Karine Pedersen (Arktisk Design).
Leat go don sámi boahtte grafittidáiddár? De fertet oassálastit min street art-bargobádjái man mii lágidit ovttas Arktisk Grafittiin. Norgga Sámiid Riikasearvi lea kulturpolitihkalaš organisašuvdna ja politihkkalaš áŋgiruššan dáidaga bokte lea dehálaš oassi min demokratijas ja servodatdigaštallamis. Ovttas ee. Anders Sunnain, Linda “Zina” Aslakseniin (gii lea Huffington postas rangerejuvvon gaskkal 25 eanemus váikkuhanfámolaš graffitidáiddárin máilmmis), ja Nicolai Lopézain Arktisk Grafittis veahkehit mii du ivdnet ja hábmet iežat politihkalaš jurdagiid, ja maiddái dan movt geavahit sprayabovssa.
Dása gal FERTET searvat! Don beasat vásihit buot dán, ja dasa lassin oaččut maiddái buori vejolašvuođa váikkuhit NSRa politihka boahtteáigái go oassálasttát min nuoraidkonferánssas, ”Sámi boahtteáigi – Sápmis framtid” 7.-9.b golggotmánus (mátkkoštan beaivi šaddá duorastaga golggotmánu 6.b.). Go oassálasttát nuoraidsemináras de sáhtát maiddái čuovvut NSRa 44. riikačoahkkima mii lágiduvvo Álttás seamma vahkkoloahpa.
GOAS: Golggotmánu 7. – 9. beivviid 2016 (FUOM. mátkkošteapmi Álahedjui gaskavahkku 6.10)
GOS: Thon Hotel Alta
GEAT: Buot sámi nuorat! (vuoruhit sin geat leat gaskal 13 ja 26)
DIEĐIHEAPMI
Dieđihat iežat konferánsii e-maila bokte, sáddestat e-maila phmuotka@nsr.no’ii dáiguin dieđuiguin:
Namma:
E-poastta čujuhus:
Ahki:
Mobilnummár:
Gos mátkkoštat Álahedjui?:
Biebmu (allergijat, vegetariánar jna.):
Jus leat vuollel 18 jagi de leat dát dieđut dárbbašlaččat:
Gulahallanolbmo namma/Váhnema namma (ja oktavuođadieđut):
Loga eanet dás:
Sámi-boahtteáigi – Sápmis framtid (norsk)
Sámi boahtteáigi – Sápmis framtid (sámegillii)
