Ođđa minerálapolitihkka Sámedikkis
– Dál leat ožžon minerálapolitihka rievttes geainnu ala, mojohallá Christina Henriksen.
Gaskavahku doarjjui Kultur- ja ealáhuslávdegotti eanetlohku oktasaš evttohusa áššis mineráladoaimmat sámi guovlluin. Minerálaášši lea guhká leamaš dat ášši mii lea dagahan eanemus eahpesihkarvuođa das guđe guvlui Sámediggi galgá mannat, muhto dál doarju viimmat Sámediggi oktasaš politihka.
– Vuosttažettiin deattuhit ahte minerálalága FERTE rievdadit, ja mii leat čavgen premissaid mat fertejit leat vuođus ovdal go Sámediggi sáhttá árvvoštallat miehtat mineráladoaimmaide, muitala áššejođiheaddji Christina Henriksen, NSR/SáB, ja dan dieđu sáddet dál Stuoradiggái.
– Go ná stuora eanetlohku doarju min, de lea mis fápmu gáibádusa duohken ahte sihtat minerálalága mii váldá vuhtii árbevirolaš vuoigatvuođaoamasteddjiid, ja sin vuoigatvuođa mieldemearrideapmái, lohká Henriksen.
– Lea deaŧalaš ahte Sámedikkis lea nanu ja sihkkaris minerálapolitihkka. Mii NSR:s leat oaidnán min ovddasvástádussan ahte Sámediggi soabada politihkas mas lea govdá doarjja, seammás go lea juoga maid ieža sáhttit bealuštit. Ja mii gal leat hui duhtavaččat bohtosiin, lohká Henriksen.
Lávdegotti evttohus gohčču maiddái Sámediggeráđi rievdadit minerálaveahki.
– Evttohusas dovddasta Sámediggi ahte dat reaidu mii lea, namalassii minerálaveahkki, ii leat doarvái buorre, čilge Henriksen.
Dán soahpamuša bokte lea Sámediggi dál dovddastan ahte minerálaveahkki ii leat doaibman dan hámis go dál lea. Sámediggeráđđi oažžu dál bargun vuđolaččat ođastit minerálaveahki vai dat livččii ávkin sámi beroštumiide ja iige leat mielde noađuheame vuoigatvuođaoamasteddjiid nugo dál.
Sámedikki dievasčoahkkin galgá meannudit ášši ”Mineráladoaimmat sámi guovlluin” duorastaga maŋŋelgaskabeaivvi.
Gulahallanolmmoš:
Sámediggeáirras Christina Henriksen, NSR/Sáb, 90919131
