Sámi solidariteahta báhtareddjiiguin
Norgga Sámiid Riikkasearvvi luohttevašolbmuidkonferánsa Plassjes lea fuolastuvvan heahtedili geažil mii lea badjánan ollu sođiid ja riidduid geažil Afrihkás ja Gaskanuorttas, ja mii lea vearránan goddimiiguin mat leat Syria siskkáldas soađis. Syrias leat badjelaš 12 miljovnna dain 20 miljovnna syrialaččain báhtaran. Lea fuolastuhtti dilli sihke dan 8 miljovnna olbmui geat leat Syrias siskkáldasat báhtareaddjin, dan 4 miljovnna olbmui geat leat báhtareaddjin ránnjáriikkain Turkias, Libanonas ja Jordanis, ja dan sullii 250 000 báhtareaddjái geat leat ohcan visuma Schengena siskkobealde. Leat maiddá sullii 1 miljovnna olbmo geat báhtarit Libyas geat dárbbašit veahki.
Norgga Sámiid Riikkasearvi muittuha ahte mii áiddo leat čalmmustahttán ahte 70 jagi leat gollan dan rájes go stuorra oassi sámi álbmogis Norggas ieža báhtaredje fasttes soahtedaguid geažil, ja ahte danne leat mis eavttut áddet dan vártnuhis dili mas báhtareaddjit leat dál.
Norgga Sámiid Riikkasearvi háliida čájehit ahte báhtareaddjit leat bures boahtimat Sápmái, ja ávžžuha Sámi servodaga čájehit báhtareddjiide sámi gussolasvuođa. Bures boahtima sáhttá čájehit máŋgga láhkai; lea dušše hutkáivuohta mii bidjá rájáid. Buorit vuogit veahkehit sáhttá leat lágidit oktasaš doaimmaid ja deaivvademiid báikkiolbmuide ja báhtareddjiide, dahje addit skeaŋkkaid dahje ruđa. Dát ávžžuhus manná sámi servodahkii oppalaččat, muhto NSR háliida maid ávžžuhit sámeservviid álggahit doaimmaid, dahje searvat earáid álgagiidda lagašguovlluin.
Norgga Sámiid Riikkasearvi háliida čájehit ahte báhtareaddjit leat bures boahtimat Sápmái, ja ávžžuha Sámi servodaga čájehit báhtareddjiide sámi gussolasvuođa
Norgga Sámiid Riikkasearvi háliida maid ávžžuhit buot sámi gielddaid váldit vuostá soađi báhtareddjiid oassin dan našunála veahkkálasbarggus mii dál lea. Báhtareaddjit sáhttet leat dehálaš resursan sámi gielddaide gos olmmošlohku njiedjá. Go váldet báhtareddjiid vuostá, de čájehit sámi gielddat aktiivvalaš doarjaga olbmuide geat leat duođalaš heahtedilis.
Sámi gielddat sáhttet veahkehit dan bokte ahte čájehit buorredáhttu ja ahte sis leat návccat váldit vuostá eanet báhtareddjiid. Dát sádde nana signála Stuorradiggái ahte Norga nagoda váldit vuostá eanet go dan 8000 báhtareaddji Syrias nu mo Stuorradiggi lea mearridan. NSR oaivvilda ahte Norggas lea geatnegasvuohta veahkehit nu olusiid go vejolaš, ja duođas berrešii veahkehit eanet go 8000 olbmo. Dain 12 miljovnna olbmuin geat leat báhtaran, dagaha 8000 dušše 0,07 %.
Norgga Sámiid Riikkasearvi ávžžuha Stuorradikki geahčadit báhtareaddjiheahtedili mii stuorru, váldit ovddasvástádusa ja meannudit ášši ođđasit, ja dalle fertejit olmmošvuohta, olmmošárvu ja olmmošvuoigatvuođat leat vuođđun.
