Spontána sámi solidaritehtakonsearta

NSR 2015 luohttevašolbmuidkonferánssa oktavuođas dollojuvvui konsearta sámi juigiin ja artisttain (ja sámepolitihkkáriin) Lars-Jonas Johanssonain.

Konsearta galggai rievtti mielde leat konferánsaoasseváldiide, oassin vahkkuloahpa siskkáldas lágideamis. Muhto mearriduvvui goitge rahpat konseartta buohkaide, ja NSR-N geas lei ovddasvástádus konsertii, ráhkadii solidaritehtaeahkeda das, ja mearridii ahte dienas mii boahtá bileahtain galggai mannat Flyktninghjelpen:ii (Báhtareaddjiveahkkái).

Earret Lars-Jonas Johansson lullisámi klassihkkárráiddu besse earát maid searvat. Asmaras, Eritrea oaivegávpogis, báhtarii Daniel Hagos Gebre. Son lea Norggas orrun 6 jagi, ja dál son lea ásaiduvvan Plassjii. Son čuojahii instrumeantta mii lea erenoamáš Eritrea ja Etiopia guovlluin, namalassii kraar. Lei sihke fáhkka ja fiinnis go sihke riikkastivrralahttu Ol Johan Gaup ja NSR-jođiheaddji Beaska Niillas juoiggaiga Gebre kraar-šuoŋaide. Eará sajáiduvvan ja/dahje boahttevaš artisttat lávddis leigga Heaika Hætta ja Jim-Roar Wigelius guhte čuojaheigga gitára, lávlluiga ja juoiggaiga.

Oktiibuot čohkkui 4000 norgga ja 200 ruoŧa ruvnnu bileahttamáksimis. Ja go NSR ovdal dihtii lei mearridan addit 100 ruvnnu juohke konferánssa oasseváldi, bargi ja logaldalli ovddas – 75 oktiibuot – de biddjojuvvui oktiibuot 13.700 ruvnnu Flyktninghjelpen:ii. Soaitá lea dušše goaikkanas dan stuorra ábis dárbbu ektui, muhto lea goitge dehálaš váikkuheapmi ja lei čielggas ahte olbmot ledje ilus go sáhtte leat mielde das, ja dat čalmmustahtii dehálaš olmmošlaš ášši.

NSR-N ja NSR giitiba juohke áidna ovtta doarjaga ovddas!