Sámiráđđi lea álgoveardidemiid dahkan árvaluvvon sámekonvenšuvnnas mii almmuhuvui bearjadága 13.01.17. Sámiráđi mielas lea stuorra váttisvuohtan ahte árvalus ii doala otná riikkaidgaskasašrievtti dási. Sámiráđđi vuosttažettiin čujuha čuovvovaš áššiide:
1. Konvenšuvdnaárvalus duššindahká sámi álbmoga iešmearrideami go dan vuoigatvuođa buohtastahttá konsultašvdnavuoigatvuođaiguin.
2. Konvenšuvdnaárvalus addá stádaide oktonas loahpalaš válddi mearridit geat sáhttet dieđihuvvot sámedikkiid jienastusloguide.
3. Konvenšuvdnaárvalus dohkkeha iešalddis sámi eananvuoigatvuođaid, muhto dasto rahppá vejolašvuođa dáid vuoigatvuođaid ektui sisabahkkemiid friddja, dieđihuvvon ovdalgihtiimiehtama hága (Free, Prior and Informed Consent).
4. Konvenšuvdnaárvalus ii dovddas mearrasápmelaččaide vuoigatvuođaid daid vuonaide ja lagas riddoguovlluide man sii leat áiggiid čađa geavahan.
Lei Sámiráđđi Sámekonferánssas Åres 1986:s mii vuosttaš heave evttohii ahte sámekonvenšuvdna galggašii ásahuvvot. Danin Sámiráđđi dovdá erenoamáš ovddasvástádusa bearráigeahččat ahte sámekonvenšuvdna dohkkeha ja nanne sámi álbmoga vuoigatvuođaid.
Sámiráđđi áigu dál vuolggahit proseassa gos sámi siviilaservodat oažžu vejolašvuođa veardidit ja buktit evttohusaid sohppojuvvon sámekonvenšuvdnaárvalussii.
