Sámiráđđi lea Suoma, Norgga, Ruošša Federašuvnna ja Ruoŧa sámi organisašuvnnaid eaktodáhtolaš ja iešráđálaš kulturpolitihkalaš ja politihkalaš ovttasbargosearvi. Sámiráđđi lea ii-ráđđehuslaš siviilaorganisašuvdna (non-governmental organization).
Sámiráđi váldoulbmilin lea gohcit sámiid vuoigatvuođaid ja beroštumiid oktan álbmogin, nannet sámiid oktiigullevašvuođa riikkarájáid rastá oktan álbmogin. Sámiráđđi bargá maiddái riikkaidgaskasaččat sápmelaččaid ja eará eamiálbmogiid beroštumiid ja vuoigatvuođaid, ja árktalaš ja birasáššiid ovddideami ja sihkkarastima várás. Dat dahkkojuvvo solidariteahttavuoiŋŋas eamiálbmogiiguin. Sámiráđđi bargá maid kulturpolitihkalaš áššiiguin ja oppalohkáige politihkalaš gažaldagaiguin.
Ossodagat. Sámiráđis leat dál doaimmas golbma temáhtalaš ossodaga: Árktalaš – ja birasáššiid ossodat, olmmošvuoigatvuođaossodat ja kulturossodat. Stuorra oassi ráđi barggus doaimmahuvvo ossodagaid bokte. Čállingoddi Sámiráđis lea čállingoddi, man jođiha váldočálli. Čállingotti bargun lea dikšut ráđi ekonomiija, raporterema, reivvestallama, ordnet čoahkkimiid ja konfereanssaid ja válbmet daid áššiid. Čállingoddi dikšu maid ossodagaid ekonomiijaáššiid ja veahkeha ossodagaid daid doaimmahit.
Sámiráđi Olmmošvuoigatvuođaid ossodaga (OVO) jođiheaddji jođiha Sámiráđi barggu olmmošvuoigatvuođaid suorggis. Dása gullet oassálastin ON ja eará riikkaidgaskasaš proseassaide, mat leat dehálaččat álgoálbmogiid rivttiide. Ulbmilin lea sihke fievrridit ovdáneami ovddosguvlui álgoálbmotrivttiid suorggis ja oažžut áigái juo gávdnovaš rivttiid beaktilis geavahusa sámiide ja eará álgoálbmogiidda.
Vai oččošeimmet áigái sámiid rivttiid beaktilut geavahusa, OVO jođiheaddji bargá maiddái loktemiin bajás rihkkumušaid sámiid rivttiid vuostá riikkaidgaskasaš arena ala. Dasa lea ulbmil, ahte ON-orgánat jnv fuolahivčče ahte eatnamat, main leat sápmelaš ássit, čuvvot iežaset riikkaidgaskasaš geatnegasvuođaid sámiide.
OVO jođiheaddji sáhttá maiddái váldit oasi árktalaš ja birasgažaldagaid bargui dakko gokko dán suorggi ovdáneapmi manná badjálagaid olmmošvuoigatvuođagažaldagaiguin.
OVO jođiheaddji oassálastá maiddái riikkasis sámepolitihkalaš ságastallamii sihke iežas kapasitehtas ja válbmemiin oainnuid sámepolitihkalaš gažaldagain Sámiráđđái, dan Bargolávdegoddái ja Presidentii.
Dán virgái mii háliidit olbmo, geas lea oahppu allaskuvllas/ universitehtas master dahje sullasaš dásis, gos dakkár juridihkalaš magistardutkosis (LLM) addá erenoamáš lasseánssuid.
Virgi gáibida erenoamáš buorre dáiddu hupmat ja čállit eŋgelasgillii. Ohcci galgá dasa lassin máhttit ovtta davviriikkalaš váldogiela ja millosepmosit maid sámegiela. Lea buorre juos ohcci dasa lassin máhttá ruoššagiela.
Virgi lea hui iehčanas, ja lea ollu ossodatjođiheaddjis gitta, hábmet ossodaga ja dan doaimma. Ohccis ferte danin leat hui buorre attáldagat bargat iehčanasat, nana návccat dahkat iežas álgagiid iige oaččo ballat dahkamis mearrádusaid roahkkadit. Bargui gullet eatnatvuohta konfereanssaid, čoahkkimiid ja mátkkiid. Ohccis ferte nappo leat sosiálalaš gelbbolašvuohta ja ferte leat gárvvis dasa ahte stuorra oassi barggus ferte dahkkojuvvot ruovttu olggobealde. Dasa lassin deddojuvvo diehtu sámeservodaga birra.
Virgi lea 3 jahkái oasseáigevirgi mas virggi dárkilis viidodat sáhttá heivehuvvot sávaldagaide. Bálkká birra sohppojuvvo. Álgin lea 01.01.17.
Sámiráđi tematihkalaš ossodagaid jođiheaddjit barget dábálaččat doppe gos ásset. Virgi ii gáibit ahte dan hálddašeaddji galgá fárret gosa nu.
Gažaldagaide barggu tematihkalaš sisdoalu birra vástida Sámiráđi dálá OVO-jođiheaddji Ánne Nuorgam, tel. +358 4053 43316. Eará dieđuid virggi birra addá presideanta Áile Jávo, tel. +47 950 25 926.
Rivttesin duođaštuvvon duođaštusat ja bargoduođaštusat galget biddjojuvvot lasáhussan elektrovnnalaš ohcamuššii. Duođaštusat ja dutkosiid báhpárat, mat leat bábirhámis eai máhcahuvvo muhto baicce duššaduvvojit.
eboasta: saamicouncil@saamicouncil.net
