Sámediggeráđđi lea juolludan 1 miljon ruvnno árktalaš eanadollui davvin. Maiddái mannan jagi juolludii Sámediggi sullasaš supmi áŋgiruššamii eanadoaluin davvin. Dán jagi lea Sámediggi maiddái ožžon ohcamiid bohccobierggu vuovdaleapmái Davvi-Norggas.
- Áŋgiruššan ja ovttasbargoprošeavttat fylkkarájáid rastá nanne maiddái sámi eanadoalu, dainna lágiin ahte mii leat dahkamin árktalaš biepmuid geasuheaddjin márkanis ja geavaheddjiid gaskkas. Dakkár oktasaš áŋgiruššan olles Davvi-Norgga bealis eanadoallo- ja boazodoalloealáhusas addá árktalaš biepmuide stuorra ovddu olgoriikkalaš buktagiid ektui, dadjá sámediggeráđđi Thomas Åhrén.
Árktalaš eanadoallu lea áŋgiruššansuorgin ráđđehus strategiijas davviguovlluid várás.
Maiddái doarjja boazodollui
Sámediggeráđđi lea maid juolludan 100 000 ruvnno prošektii “Ut på vidda/ Meahcis. Prošeakta lea viidásetfievrrideapmi prošeavttas “Inn på tunet/ Šilljui” Finnmárkkus, mii lea nationála áŋgiruššansuorgi mas válljejuvvon oapmedálut fállet kvalitehtasihkkarastojuvvon ja heivehuvvon ahtanuššanbálvalusaid olbmuide, dohkkehuvvon oapmedáluid bokte.
Oapmedálut prošeavttas fállet doaimmaid mat addet oaivillaš bargguid, máhttima, ovdáneami ja loaktima olbmuide geat iešguđet ákkaid dihte leat gáhččan olggobeallái bargoeallima. “Ut på vidda/ Meahcis” lea oaivvilduvvon seamma sullásaš doaibman heivehuvvon boazodollui.
-Sámediggi lea dorjon “Šilljui” 2012 rájis. Dát lea addán buori ovdáneami eanadoalus, go sii leat ožžon eanet vejolašvuođaid birget ekonomalaččat. Muhto lihka dehálaš lea ahte eanadoallu maid sáhttá váikkuhit buriide arenaide molssaevttolaš oahpahussii ja bargohárjáneapmái dearvvašvuođa- ja sosiálasuorggis. Lea hui buorre go dál dahkat seamma boazoealáhusa várás, loahpaha Åhrén
Gulahalli
sámediggeráđđi Thomas Åhren, tel. +47 908 39 663