Sámediggeráđđi lea juolludan oktiibuot 21,9 miljon ru doarjjan árbedieđu, dearvvašvuođa, ealáhusaid, giela ja máhtu oktavuođas áigodagas skábmamánu 2014 rájes dán jagi guovvamánu rádjai. Birrasii 10 miljon ru lea juolluduvvon kultursuorgái, earret eará leat addán doarjaga ollu CD- almmuhemiide ja girjealmmuhemiide. Dat boahtá ovdan Sámediggeráđi raporteremis dan birra maid leat dahkan mannán dievasčoahkkima rájes juovlamánus.
- Mii leat juolludan doarjaga olles 18 ođđa CD-almmuheapmái. Ohcciid gaskkas leat dovddus namat earret eará Felgen Orkester ja Elin Kåven, muhto maiddái leat juolludan gelddolaš almmuhemiide árbevirolaš luođi siskkobealde, cealká sámediggeráđđi Ann-Mari Thomassen.
Doarjja lea maiddái addojuvvon 31 girjealmmuheapmái davvi-, julev- ja máttasámegillii.
Doarjja Romssa universitehtii
Dasto lea Romssa universitehta Finnmárkku fakultehta ožžon doarjaga golmma sierra prošektii nu go veahkaváldi lagaš gaskavuođain, álgoálbmogat ja sosiála bargu, dasto leat addán doarjaga kártet makkár eallinhástalusaid vásiha boazodoalli geas leat dearvvašvuođaváttisvuođat go váldá oktavuođa NAV:in.
Sámediggeráđđi háliida nannet rabasvuođa Sámedikki doarjjahálddašeami ektui, ja áigu danne almmolašvuhtii dieđihit doarjjaruđaid geavaheami juohke sámediggeráđi dieđáhusas Sámedikki dievasčoahkkimii.
Oktavuohta:
Sámediggeráđđi Ann-Mari Thomassen, tel, +47 900 57 123