Sámediggeráđđi lea áigodagas guovvamánu 3. b rájes miessemánu 5. b. rádjai juolludan 11,1 miljon ru sámi áigumušaide. Ođđa gründerforum Nuorta-Sálttus, ja sámi dáidaga ja kultuvrra riikkaidgaskasažžan dahkan gullet daidda doaibmabijuide mat leat ožžon doarjaga. Dat boahtá ovdan Sámedikki raporttas dan birra maid sii leat čađahan ovddit dievasčoahkkima rájes njukčamánus.
Ráđđelahttu Ann-Mari Thomassen vuorddaša čearggusmielain maid Nuorta-Sálttu gründerforum – Rággu – buvttiha áigái regiovnnas.
- Geasuheaddji báikegottit, gosa olbmot háliidit ássat, dárbbašit movttegis ealáhushutkiid ja buriid báikkálaš birrasiid ealáhusovddideapmái. Ealáhushutkit geat leat Rággu duogábealde, háliidit láhčit aiddo dasa Nuorta-Sálttus ja prošeakta lea min mielas hui gelddolaš. Erenoamáš deaŧalaš lea nuorra ealáhushutkiid čalmmustahttit.
Thomassen oaivvilda ahte go Rággos čalmmustahttá nuorra ealáhushutkiid Nuorta-Sálttus, de dat nannet prošeavtta erenoamážit, go dat sáhttá veahkkin máhcahit dan soju ahte nuorat ohcalit stuorra gávpogiidda.
Sámi dáidda ja kultuvra olggos máilbmái
Viidáseappot lea sámediggeráđđi juolludan doarjaga máŋgga prošektii maid áigumuš lea oahpásmahttit sámi dáidaga ja kultuvrra olgoriikii.
Sámi dáiddárráđđi lea ožžon doarjaga prošektii Sámi Contemporary in Berlin, Sámi Teáhtersearvi lea ožžon doarjaga Sami Performing Arts Festival in NYC:ii ja Audioland AS lea ožžon doarjaga Sami Culture in Cuba:ii.
Gulahalli:
Sámediggeráđđi Ann-Mari Thomassen, tel, +47 900 57 123