![](/share/icons/crystal/16x16/mimetypes/pdf.png)
Sámediggeráđđi juolludan oktiibuot 15 miljon ruvnno doarjjan dearvvašvuhtii, kultuvrii, ealáhussii ja oahpahussii ođđajagimánu 2014 rájes. 4,5 miljon ruvnno lea juolluduvvon ealáhusdoaibmabijuide, ja 4,9 miljon ruvnno fas lea juolluduvvon iešguđet kulturdoaibmabijuide.
– Mis lea maid 1,2 miljon ruvnno iešguđet doaibmabijuide gielddain main lea ovttasbargošiehtadus Sámedikkiin. 200 000 ru lea juolluduvvon Finnmárkku fylkkagildii prošektii mas merkejit ja ođasmahttet bálgáid ja mátkeláhtuid Finnmárkkus. Háliidan maid váldit ovdan Bolyst nammasaš prošeavtta Kárášjoga gielddas, mii lea ožžon 400 000 ruvnno. Eanet áŋgiruššan ovddidemiin ja čalmmustahttimiin sámi guovlluid kvalitehtaid, lea hui deaŧalaš dadjá sámediggeráđđi Ann-Mari Thomassen.
Eará juolludeamit gielddalaš prošeavttaide lea 55 000 ru sámi museadoaimmaid álggaheapmái Bálágis, ja 400 000 ru prošektii Nordlysattraksjon Álttá suohkanis. Eanaš oassi doarjagiin, 4,9 miljon ruvnno, lea mannan iešguđet kulturdoaibmabijuide. Dás maiddái doarjja sámi lágádusaide, guovvamánu 6.b. lágidemiide ja eará sámi lágidemiide, teáhterii, filbmii, Sámi Grand Prixii ja doaibmabijuide mánáid ja nuoraid várás. 4,6 miljon ruvnna lea juolluduvvon doarjjan sámi mánáidgárddiide ja stipeanddaide daidda ohppiide geat lohket sámegiela joatkkaskuvllas.
– Ealáhusbealis mii leat vuoruhan doarjaga oastit bivdofatnasiid ja iešguđet doaibmabijuide vuostáiváldimii ja bálvalussii gáttis riddofatnasiid várás. Muhto mii leat maid veahkehan ruhtadit ovddidandoaibmabijuid eanadoalu ja mátkeealáhusaid várás ja bálvalussuorggi investeremiid, dadjá Ann-Mari Thomassen.
Sámediggeráđđi háliida nannet rabasvuođa Sámedikki doarjjahálddašeamis, ja áigu danne almmuhit doarjjaruđaid geavaheami juohke dieđáhusas sámediggeráđis Sámedikki dievasčoahkkimii.
Gulahalli
Sámediggeráđđi Ann-Mari Thomassen, tel. +47 900 57 123