Sámediggeráđđi lea juolludan 300 000 ru RiddoDuottarMuseii iežas magasiinnaid bajásdoallamii. -Nu mo dáiddačoakkáldat dál vurkejuvvo Sámiid Vuorká-Dávviriin, de sáhttet ollu buktosat billašuvvat. Dát lea hui deaŧalaš bajásdoallan, man ii sáhte šat maŋidit oaivvilda ráđđelahttu Henrik Olsen.
RiddoDuottarMuseat bivddii 2013:s juo konserváhtora árvvoštallat sihke govat ja diliid magasiinnain. Sii leat dieđihan vahágiid máŋgga buktosiin čoakkáldagas.
- Čoakkáldat mas leat árvvolaš sámi dáiddaártnat, ánssáša buoret dili ja mii dohkkehit RiddoDuottarMuseats bajásdoallandárbbu. Mii fertet čađahit dán loktema dál vai maiddái maŋit áiggis beassat muosáhit čoakkáldaga, cealká ráđđelahttu Henrik Olsen.
Dáiddačoakkáldagas mii lea vurkejuvvon Sámiid Vuorká-Dávviriidda Kárášjogas, leat dál sullii 1200 buktosat ja dat lea máilmmi stuorámus sámi dálááiggi dáiddačoakkáldat. Sámediggi eaiggáduššá sullii 1000 buktosa ja Sámiid Vuorká-Dávvirat eaiggáduššet 178 buktosa. RiddoDuottarMuseas lea hálddašanovddasvástádus ja dáiddabuktosat lea vurkejuvvon magasiidnalanjaide mat gulle Sámiid Vuorká-Dávviriidda Kárášjogas.