Sámediggeráđđi juolluda 300 duhát ruvnno Aajege – sámi giella- ja gealboguovddážii čielggadit vejolašvuođa ásahit sámi viesu Plassje guvlui.
Árrat 1970-logus álggahuvvui bargu ásahit sámi kulturguovddáža Plassjii. Guovllu sámi biras háliidii ásahit arena guovllu sápmelaččaid várás. Barggu čađahii guovllu sámi biras.
1996:s nammaduvvui ođđa lávdegoddi dan várás ahte ásahit vuođđudusa buot Plassje sámi guovllu báikkálaš sámi organisašuvnnaid lahtuiguin. Dan maŋŋá loahpahuvvo sierra viesu ásaheapmi lullisámi kulturguovddážin Plassjes, ja dan sadjái boahtá doaibmabidjovuđot bargu.
Njuolgga boađusin viidáset rahčamušas šattai “Raasten rastah – Lullisámi kulturfestivála” mii vuođđuduvvui 2002. Festivála váldoulbmil lea oččodit kultuvrralaš ja sosiála deaivvadansaji lulimus lullisámi regiovnna sápmelaččaide Norgga ja Ruoŧa bealde.
-Plassje lea lullisámi kultuvrra deaŧalaš fápmoguovddáš. Danne lea deaŧalaš viidáseappot ovddidit ja nannet dan sámi infrastruktuvrra mii lea ásahuvvon dakko bokte ahte čohkket gelbbolašvuođa seamma robi vuollái, ja háhkat stuorát saji doaimmaid ja doaibmabijuid čađaheapmái, dadjá sámediggeráđđi Thomas Åhren.
Sámediggi ruhtada prošeavtta ovttas fylkkain ja suohkaniiguin, dadjá sámediggeráđđi Ann-Mari Thomassen. Prošektii galgá ásahuvvot Stivrenjoavku mas leat mielde olbmot Plassje suohkanis, Lulli-Trøndelága ja Hedmárkku Saemiej Saervie ja Aajege. Aajege galgá leat prošeaktaeaiggát, ja galgá jođihit prošeavtta.
Sámediggeráđit Ann-Mari Thomassen ja Thomas Åhren dadjaba ahte sámi deaivvadansajit leat deaŧalaččat dasa ahte nannet ja oainnusindahkat sámi giela ja kultuvrra, ja danne juolluda sámediggeráđđi ruđaid čielggadit vejolašvuođa ásahit sámi viesu Plassjii.
Eanet dieđuid addiba:
Sámediggeráđđi Ann-Mari Thomassen, 900 57 123
Sámediggeráđđi Thomas Åhren, 908 39 663
