56 miljovnna sámi doaibmabijuide miessemánu rájes

Sámediggeráđđi lea oktiibuot juolludan 55 992 900 ru doarjjan dearvvašvuhtii, ealáhusaide, gillii, kulturmuitosuodjaleapmái, kultuvrii ja máhttui 13.05 rájes 19.09 rádjai dán jagi. Sullii 25 000 000 lea juolluduvvon máhttosuorgái, dás maiddái doarjagat sámi mánáidgárddiide, sámi giellaoahpahussii ja ođđa oahpponeavvuid ráhkadeapmái. 

- Leat ožžon ollu doarjjaohcamiid dán áigodagas ja oktiibuot leat olles 261 ohcama ožžon juolludemiid. Mii leat earret eará juolludan 7 997 500 ealáhusovddideapmái. Dát leat ruđat mat bohtet njuolgga sámi servodahkii buorrin, cealká ráđđelahttu Ann-Mari Thomassen.

Sámediggeráđđi lea earret eará juolludan ollu ruđaid ruhtadit Hávnna jorgalanhávnna ovddideami turistaskiippaid várás Porsáŋggu gielddas. Jorgalanhávdna šaddá daid turisttaid vuosttaš ja maŋimus mátkegeahči, geat johtet Davvi-Norgii turistaskiippain.

- Dán prošeavttas lea čielgasit vejolašvuohta hutkamii, ovdáneapmái ja ođasmahttimii Finnmárkku ja Sámi mátkeealáhusas. Danne lea min mielas deaŧalaš vuoruhit doarjaga dán hutkás mátkeealáhusprošektii, cealká ráđđelahttu Thomassen.

Maiddái Djupvik Camp og Maskin AS, Naked North Events AS, Arctic cruise in Norway AS, Kjetil Larsen ja Løkvollstranda Camping AS leat ožžon ruđaid dakkár investeremiidda mat galget nannet Davvi-Norgga ja sámi mátkeealáhusaid.

Sámediggeráđđi háliida nannet rabasvuođa Sámedikki doarjjahálddašeami birra, ja áigu danne almmuhit doarjjaruđaid geavaheami juohke dieđáhusa oktavuođas maid sámediggeráđđi ovddidan Sámedikki dievasčoahkkimii.

Gulahalli:

Sámediggeráđđi Ann-Mari Thomassen, tel. +47 900 57 123

Loga eanet dás:

Oahpponeavvut: Vuoruha sámegiela nubbigiellan

Giella: Sámegielain lupmas

Juolluduvvon doarjagat 13.05.14 – 19.09.14