Sámediggeráđđi lea áigodagas borgemánu 28.b. rájes gitta skábmamánu 2.b. rádjái juolludan 8,2 miljovnna ruvnno sámi áššiide. Ollislaš 8,2 miljovnna ruhtalánas lea 3,7 miljovnna ruvdno juolluduvvon ealáhussuorgái ja ráđđelahttu Ann-Mari Thomassen lohká ahte lea movttiidahtti oaidnit movtta ja ođđaásaheami ealáhussuorggis Sámis.
- Dán áigodagas leat máŋga ealáhusaktevrra mat leat ožžon doarjaga Sámedikkis. Earret eará leat mii juolludan investerendoarjaga viđa guolástanfatnasii, ođđaásahuvvon buvttadanfitnodahkii sámi lávde- ja oaidnindáidagiid várás, ja maid álggaheapmái ja viidásetovddideapmái máŋgga mátkkoštanealáhusaide. Stuora ohcanlohku čájeha ahte Sámis lea ilolaš ealáhusmokta, lohká Thomassen.
Ráđđelahttu Thomassen deattuha viidáset dehálašvuođa girjás ealáhusmáilmmi ja bargosajiin nuoraide. Son geassá dan oktavuođas ovdan juolluduvvon doarjaga mii lei 350 000 ruvnno Finnmárkku nuorra ealáhusásaheapmái.
- Midjiide lea dehálaš jorgalit eretfárrenrávnnji sámi guovlluin, ja dan ahte ásahit girjás ealáhusmáilmmi ja bargosajiid nuoraide, lea vealtameahttun jus dainna galgat lihkostuvvat. Iežas prošeavttain galgá Nuorra ealáhusásaheapmi kurset ja čuovvolit skuvllaid, oahpaheddjiid, bagadalliid ja skuvlajođiheddjiid geat barget ođđaásahemiin sámi guovlluin, lohká son loahpas.
Olmmoš geainna sáhttá váldit oktavuođa:
Sámediggeráđđi Ann-Mari Thomassen, tlf, +47 900 57 123