Sámediggeráđđi lea juolludan 623 400 ru. prošeavttaide mat ovddidit árbedieđu ja sámi meahccegeavaheami vuođđoskuvllas. Billávuona mearrasámi šaddanguovddáš, Deanu Sámeskuvla, Guovdageainnu mánáidskuvla ja Tårnet skuvla ožžot doarjaga iežaset prošeavttaid čađaheapmái.
- Buot ovddimusat áiggun rámiidit daid skuvllaid mat háliidit čađahit prošeavttaid mat ovddidit árbedieđu ja sámi árbedieđu ja mat geavatlaš oahpahusa bokte geavahit eará arenaid oahpahusas go luohkkálanja, cealká sámediggeráđđi Silje Karine Muotka.
Son deattuha viidáseappot ahte árbediehtu ja sámi meahccegeavaheapmi lea deaŧalaš vásáhusmáhttu maid gaskkustit boahtte buolvvaide.
- Lean ilus go mii sáhttit váikkuhit dasa ahte boahtte buolvvat besse oahppa sámi árbevieruid ja meahccegeavaheami skuvllas. Dákkár prošeavttain, maid dábálaš gielddabušeahtat ja skuvllaide várrejuvvon ruđat eai govčča, ožžot oahppit hui mávssolaš máhtu sámi historjjá, árbevieruid ja servodateallima birra.
Gulahalli:
Sámediggeráđđi Silje Karine Muotka, tel. 984 87 576
Prošeavttat mat ožžot doarjaga Sámedikkis:
Billávuona mearrasámi šaddanguovddáš lea ožžon 250 000 ru čađahit prošeavttat luondduresurssat borramuššan; ráhkadit borramušaid ja máistagiid lunddolaš álgoávdnasiin/urtasiin mat leat luonddus. Prošeavttain lea ohcci bidjan mihttomearrin ahte oahppit ja oahpaheaddjit galget háhkat eanet gelbbolašvuođa das ahte geavahit lagasbirrasa lunddolaš arenan ávkkástallat luonddubuktagiin ja geavahit máistagiid, guobbariid, murjjiid ja oahppat láibut bárkoláibbi geavahettiin maiddái mearrasámi kultuvrra álgoávdnasiid.
Deanu Sámeskuvla lea ožžon 230 000 ru iešguđet doaibmabijuide ovddidit sámegiela, sámi identitehta ja sámi árbedieđu ja meahccegeavaheami skuvllas. Prošeakta galgá seammás gaskkustit árbedieđu boarrásat buolvvas nuorat bulvii.
Guovdageainnu mánáidskuvla lea ožžon 120 000 ru iešguđet doaibmabijuide ovddidit sámegiela, sámi identitehta ja sámi árbedieđu ja meahccegeavaheami skuvllas. Skuvla áigu earret eará hukset darfegoađi mii galgá leat báiki gosa luohkkálanja oahpahus sirdojuvvo ja doaibmat sámi giellalávguma ja giellaoahpahusa arenan. Eará árbevirolaš doaimmat mat galget čađahuvvot dán prošeavtta olis leat earret eará luondduresurssaid čohkken, muorrameahcci ja muoraid háhkan, náhki ráhkadeapmi, murjen, sáimmastallan, sámegáhkuid gáhkken, darfegoađi huksen, ulluid geavaheapmi, sávzzaid beaskideapmi, ulluid ivdnen, rievssahiid bivdin ja gárdun.
Tårnet skuvla, Mátta-Várjjaga gielddas, lea ožžon 23 400 ru hukset lávu- ja/dahje luovi muorraávdnasiin mii galgá geavahuvvot arenan dakkár olgoskuvlii mii lea heivehuvvon doaibmavádjigiidda. Skuvla, Tårnet skuvla, lea maid bargan prošeavttain (2012) mii lea dakkár skuvla mii lea mearrasámi kultuvrra ja vuotnaguolásteami kulturguoddin. Prošeavtta ulbmil lea nannet ohppiid mearrasámi duogáža ja ovddidit mearrasámi kultuvrra. Dát prošeakta lea ovttastahttán ja bargá ovttas gili iešguđet joavkkuiguin ja servviiguin ja eará resursaolbmuiguin. Daid buriid vásáhusaid vuođul maid skuvla lea ožžon guoskevaš prošeavtta bokte ovttasbargoguimmiiguin, háliida skuvla dál álggahit prošeavtta 1.-4. ceahki ohppiid várás vai buot skuvlla oahppit ožžot dákkár oahpahusa 1. ceahki rájes juo.