Sámediggeráđđi Thomas Åhrén reagere garrasit go Midtre Gauldal suohkan áigu sihkkut máinnašumi boazodoalu ja sámi beroštumiid birra ođđa plánaprográmmas. Åhrén deattuha ahte plána- ja huksenláhka maŋimus jagiid lea čavgejuvvon, aiddo fal fuolahan dihtii álgoálbmogiid beroštumiid almmolaš plánaproseassain.
- Nu mo suohkanstivrra digaštallan lea máinnašuvvon báikkálaš mediain, de dat orru leamen sihke gudneheapmin ja vealaheapmin. Ii sáhte jávkadit álgoálbmogiid beroštumiid dušše sárgestemiin ja beaŋkaevttohusain historjjálaš ovdagáttuid vuođul, deattuha sámediggeráđđi Thomas Åhrén.
Midtre Gauldal suohkana suohkanstivra mearridii ovttajienalaččat sihkkut suohkanplánaevttohusas dan oasi mii dadjá ahte boazodoallu galgá árvvoštallojuvvot sámi kultuvrra vuođđun. Sámediggeráđđi áigu dál guorahallat ášši ja suohkana mearrádusa, earret eará mearrádusa lobálašvuođa. Son gávnnaha maiddái ahte ii oro Sámedikki plánaveahkki ge čuvvojuvvon.
- Áigumuš dainna viiddes láhkasuodjalusain maid sámi kultuvra ja sámi boazodoallu lea áiggi mielde ožžon, lea ge aiddo fal dat ahte suodjalit sápmelaččat sahtedohko politihkalaš meannudeami ja vealaheami vuostá. Orru leamen nu ahte Midtre Gauldal álbmotválljen áirasat eai leat ipmirdan váikkuhusaid dás, dadjá Åhrén.
Gulahalli:
Sámediggeráđđi Thomas Åhrén, tel. +47 908 39 663
Leaŋkkat
Ášši Trønderbladet nammasaš aviissas: Nekter å si R for rein
Midtre-Gauldala ovttajienalaš mearrádus