Sámedikki presideanta Aili Keskitalolea okta dain geain lea álgosáhkavuorru go ON váldočoahkkin rahpá máilmmikonferánssa álgoálbmotvuoigatvuođaid birra čakčamánu 22. b.
ON váldočoahkkin lágida WCIP 2014 (World Conference on Indigenous Peoples 2014) čakčamánu 22. ja 23.b. Konferánsii bohtet stáhtanjunnošat, ráđđehusnjunnošat, ministarat ja álgoálbmogiid eará njunušovddasteaddjit digaštallat doaibmadiđošteaddji loahppadokumeantta dan birra mo čađahit álgoálbmogiid vuoigatvuođaid ja mo fápmuibidjat ON julggaštusa álgoálbmotvuoigatvuođaid birra (álgoálbmotjulggaštusa) mii dohkkehuvvui 2007 stáhtaid ektui.
- Min ulbmil máilmmikonferánssa bargguin lea leamaš sihkkarastit buoremus vejolaš konkrehta ja geatnegahtti loahppadokumeantta mii sáhttá leat mielde váikkuheamen dasa ahte stáhtat ja ON-vuogádat čuvvot dohkkehuvvon mearrádusaid ja prinsihpaid, dás maiddái ON álgoálbmotjulggaštusa. Mii leat mealgadii juksat ovttamielalašvuođa daid mekanismmaid ja proseassaid ektui mat galget sihkkarastit dakkár fápmuibidjama nationála ja máilmmiviidosaš dásis, dadjá sámediggepresideanta Aili Keskitalo.
ON máilmmikonferánsii New Yorkas čakčamánus servet máŋga oassálasti sámiid bealis, earret eará lahtut Sámi parlamentáralaš ráđis mii lea Norgga, Ruoŧa ja Suoma beale sámedikkiid ovttasbargoorgána. Maiddái davviriikkalaš eahpestáhtalaš paraplyaorganisašuvdna Sámiráđđi lea ovddastuvvon.
- Mii leat maid bargan árjjalaččat dainna ahte sihkkarastit iešmearridanásahusaide iehčanas stáhtusa ja vuoigatvuođa oassálastit ON:i. Dát lea leamaš hui deaŧalaš midjiide, sihkkarastin dihtii oassálastima daidda ON mearridanproseassaide mat gusket álgoálbmogiidda. Min mielas mii lea oalle bures nagodan dan, dadjá Keskitalo.
New York máilmmikonferánssa loahppadokumeantta šiehtadallamat leat bistán miessemánu 2014 rájes. Deaŧalaš vuođđu šiehtadallamiidda ON:s lea leamaš loahppadokumeanta máilmmiviidosaš, ráhkkaneaddji álgoálbmotkonferánssas Álttás 2013:s. ON váldočoahkkima presideanta lea jođihan šiehtadallamiid ovdal dán jagi máilmmikonferánssa.
Gulahalli:
Sámedikki presideanta Aili Keskitalo, tel. +47 971 29 305
Ráđđeaddi Inger Johanne Mudenia, tel. +47 78 47 04 20
Ossodatdirektevra Hege Fjellheim, tel. +47 994 59 211
Eanet dieđut dáppe
ON neahttasiidu konferánssa várás
Konferánsaprográmma
Loahppadokumeantaevttohus 2014 (rev. 3)
Duogášdokumeanttat (oktan loahppadokumeanttain Álttás 2013)