Álgoálbmotvuođđu galgá leat reaidun ovttasdoaibmamii gaskal álgoálbmogiid ja stáhtaid dasa ahte lonohallat dálkkádahkii guoski árbedieđu, kapasitehta oččodeami ja dálkkádatdoaibmabijuid.
Dađibahábut eai lihkostuvvan stáhtat loahpaloahpalaččat váldit atnui dan álgoálbmotvuođu mii mearriduvvui Pariissas 2015. Oasit leat maŋiduvvon ođđa šiehtadallamiidda miessemánus 2018.
Dattetge sohppojuvvui álgoálbmotvuođu mihttomearri ja doaibma. Ja ahte dat galget oktiivástidit álgoálbmotvuoigatvuođaiguin, ja ahte friija ja dieđuid vuođul ovddalgihtii mieđáhus álgoálbmogiin gusto máhttolonohallamii. Viidáseappot lea mearriduvvon ahte vuođđu galgá ollásit váldojuvvot atnui boahttejagi. Dálkkádatkonvenšuvnna áššebealit bidjet vuođđun ahte álgoálbmogat galget ollásit ja beaktilit oassálastit maŋimus šiehtadallamiidda, ja álgoálbmotvuođu boahttevaš doaimmaheapmái.
Silje Karine Muotka, Hindou Oumarou Ibrahim ja/og Roberto Burrero -Indigenous Caucus (Foto: Jon Petter Gintal)
-ON ii lihkostuvvon áibbas dán vuoru, ja ollu árja lea geavahuvvon šiehtadallamiidda maiddái sámiid bealis. Mun registreren ahte álgoálbmogiid vuoigatvuođat galget leat vuođđun álgoálbmotvuđđui, ja ahte áigumuš lea ahte álgoálbmogat besset ollislaččat ja beaktilit oassálastit dán vuođu bokte. Mu mielas dát lea deaŧalaš ovdáneapmi, dadjá sámediggeráđđi Silje Karine Muotka.