-Riikkaidgaskasaš váikkuhanfápmu luondduluosa hálddašeamis lea dađistaga stuorát ja stuorát, ja danne lea mu mielas dárbu sihkkarastit riikkaidgaskasaš álgoálbmotjiena dán barggus, dadjá Sámediggeráđi lahttu Silje Karine Muotka.
Sámedikki dievasčoahkkin celkkii 2012:s ahte lea dárbu heivehit álgoálbmotdimenšuvnna riikkaidgaskasaš luossaovttasbarggus NASCO:s. Sámediggi ozai ja oaččui dárkojeaddjistáhtusa NASCO:s seamma jagi. Sámediggi lei vuosttaš gearddi dárkojeaddjin diibmá. Dán jagi sešuvdna lea geassemánu 3. – 6. beivviid Frankriikkas.
NASCO - North Atlantic Salmon Conservation Organization lea daid stáhtaid organisašuvdna mat hálddašit luondduluosa. Norggas lea Norgga Bivdi- ja guolástussearvvis, Boanddaidsearvvis ja WWF:s dárkojeaddjistáhtus ovttas Sámedikkiin. Dán jagi sešuvdnii servet dušše Sámediggi ja Norgga Bivdi- ja guolástussearvi Norgga delegašuvnna bálddas, man Arne Eggereide Birasdirektoráhtas jođiha.
Ollu beroštumit háliidit váikkuhanfámu luossahálddašeapmái. EU lea ovdal buktán cealkámušaid Norgii das ahte bisuhit čavga regulerejuvvon mearraluossabivddu, ja Ruošša lea juobe gáibidan bissehit dán bivddu muhtun sajiin.
-Sámedikki bargun lea fuolahit ahte álgoálbmotvuoigatvuođat dollojuvvojit ja ahte sámi beroštumit deattuhuvvojit sihke regulerenbarggus ruovttuguovllus ja maiddái dalle go Norga ovttasdoaibmá eará stáhtaiguin hálddašanáššiin, deattasta Sámediggeráđđe lahttu Silje Karine Muotka.
Stáhtaid NASCO ovttasbarggu bokte biddjojuvvojit láidestusat movt luossaresurssat galget hálddašuvvot. Lea áibbas čielggas ahte dát guoská álgoálbmogiidda geat ellet dáin guovlluin. Danne háliida Sámediggeráđđi ahte álgoálbmotfuomášupmi galgá boahtit eanet oidnosii riikkaidgaskasaš proseassain.
-Dán jagi sešuvnnas áigut mii fokuseret dan ahte álgoálbmotfuomášupmi ferte searvvahuvvot NASCO iežas njuolggadusaide. Dát lea deaŧalaš danne go luossabivdu lea oassi min ávnnaslaš kulturvuođus. Jos álgoálbmotfuomášupmi heivehuvvo NASCO njuolggadusaide, de sáhttá NASCO bidjat gáibádusaid ahte álgoálbmogiid árbevirolaš guolástus oainnusmahttojuvvo ja deattuhuvvo luondduluosa hálddašeami oktavuođas buot lahttoriikkain, dadjá Muotka loahpas.