Ráđđelahttu Silje Karine Muotka oassálastá áigodagas njukčamánu 10.-14. b. ON nissonkommišuvdnii (CSW) New Yorkas. Dáinna oassálasimiin háliida Sámediggi leat mielde čalmmustahttimin álgoálbmotnissoniid vealaheapmi ja veahkaváldi sin vuostá miehtá máilmmi.
ON Nissonkommišuvdna lágiduvvo juohke jagi ja lea okta deaŧaleamos riikkaidgaskasaš deaivvadansajiin gos digaštallet nissoniin vuoigatvuođaid ovttadássásašvuođa.
- Sámediggeráđi mielas lea deaŧalaš čalmmustahttit álgoálbmotnissoniid dili go galgá ollašuhttit ON duhátjahkemihtu nieiddaid ja nissoniid várás. Oassálastima bokte Norgga sáttagoddái mii áigut deattuhit máŋga beali mat fuolastuhttet min, cealká ráđđelahttu Muotka.
Veahkaváldi ja duppal vealaheapmi
Ollu álgoálbmotnissonat ellet dakkár gierdameahttun diliin ahte sis ii leat vejolašvuohta oažžut oahpu, buori etniiddearvvašvuođa, suodjalusa njoammudávddaid vuostá dahje veahkaválddálaš rihkkuma vuostá. Álgoálbmotnissonat vásihit maiddái vealaheami sihke čearddalašvuođaset ja sohkabealiset ektui.
- Álgoálbmotnissoniid vealaheapmi ja veahkaváldi sin vuostá dahká ahte lea hirbmat váttis rievdadit dili buorebun, almmá erenoamáš doaibmabijuid haga. Mu oainnu mielde lea deaŧalaš nannet rahčama nissonolbmuid vuoigatvuođaid ovddas. Dan mun háliidan deattuhit New Yorkas, cealká Silje Karine Muotka.
Geafivuođaeastadeapmi
Geafivuođaeastadeapmi lea maid okta ON nissonkommišuvnna fáttáin.
Sullii 5 proseantta máilmmi olbmuin gullet álgoálbmogiidda, muhto sii leat 33 proseantta dain 900 miljon olbmos mat leat buot geafimusat máilmmis. Dáin 900 miljon olbmos lea nissonolbmot ja nuorra nieiddat 70 proseantta sis geat ellet hirbmat stuorra geafivuođas.
- Logut čájehit čielgasit mo dilli lea; Álgoálbmotnissonat leat badjelmearálaččat ovddastuvvon máilmmi geafimusaid gaskkas. Sin ferte oažžut eret geafivuođas, eahpedoaivvus ja veahkaválddi balu čavga sálvvas. Dan lea vejolaš juksat buoret oahppovejolašvuođaid bokte, nannoset vuoigatvuođasuodjaleami bokte, eanet politihkalaš váikkuhanfámu bokte ja stuorát árvvusatnima bokte nissoolbmuid rolla ektui sihke bargo- ja bearašeallimis, loahpaha ráđđelahttu Muotka.
Gulahalli:
Ráđđelahttu Silje Karine Muotka