Sámedikki várrepresideanta Laila Susanne Vars lea hui ilus go dál lea čielgan ahte sámi kulturmáhttu šaddá ”Kompetanse for kvalitet – strategi for videreutdanning av lærere for 2012- 2015” áŋgiruššansuorgin.
- Mun dieđán ahte Oahpahusdirektoráhta lea cealkán ahte sámi kulturmáhttu galgá vuoruhuvvot go joatkkaoahppofálaldat oahpaheddjiid várás mearriduvvo. Sámedikki oahppogažaldagat ovddasvástideaddjin mun lean hui ilus direktoráhta dovddahusaiguin dán áššis, cealká várrepresideanta Laila Susanne Vars.
Sámi oahpaheaddjioahpu regiovdna (SAK 7) lea rahčan dainna ahte oažžut sámi kulturmáhtu mielde joatkkaoahppofálaldahkan dán oahppojahkái, muhto dasa ii mieđihan direktoráhta.
Sámedikki várrepresideanta válddii dán ášši ovdan Máhttodepartemeantta stáhtačálliin Elisabeth Dahle:in go son lei oahppomátkkis Finnmárkkus giđđat. Doppe čujuhuvvui maid oahppofálaldatdárbui sámi kulturmáhtus, ja čujuhuvvui dasa ahte leat juo máŋga allaskuvlla mat leat ovddideamen dakkár fálaldagaid.
- Háliidan erenoamážit rámiidit Finnmárkku allaskuvlla mii lea rahčan hui garrasit oažžut eavttuid rievdaduvvot. Munnje lea stuorra illun oaidnit dan mii dahkkojuvvo sámi oahpaheaddjioahpu regiovnnas ja erenoamážit dat ahte das lea ávki, cealká várrepresideanta Laila Susanne Vars.
Dat ahte sámi kulturmáhttu dát šaddá áŋgiruššansuorgin, lea maid mielde ollašuhttimin dan ulbmila ahte ođđa vuođđoskuvlaoahpaheaddjioahpu studeanttain galgá leat máhtu sápmelaččaid ja sámi servodaga birra. Máhtu sámi álbmoga birra, earret eará máhttu sámi kultuvrra ja historjjá birra, dárbbaša nannet erenoamážit oahpaheaddjivirggis.
- Mu mielas lea deaŧalaš lávki rivttes guvlui go dál nannejuvvo oahppofálaldat sámi kulturmáhtus, erenoamážit dan dáfus ahte eastadit oaguhemiid ja vašuheaddji cielahemiid sápmelaččaid vuostá, dadjá várrepresideanta Vars.
Várrepresideanta Vars deattuha viidáseappot erenoamáš deaŧalažžan buorebut čalmmustahttit mearrasámi kulturgelbbolašvuođa, go dat han lea oassi dan sámi kultuvrras mii historjjálaččat lea garrasepmosit deddojuvvon stuorraservodaga bealis.
- Mus leat stuorra vuordámušat dasa ahte oahppofálaldat sámi kulturmáhtus álggahuvvo buot sámi guovlluin juo boahtte čavčča vuorddán iluin ahte buorre ovttasbarggu gaskal Sámedikki ja sámi oahpaheaddjioahpu regiovdna joatkašuvvá, loahpaha várrepresideanta Laila Susanne Vars.
Gulahalli:
Várrepresideanta Laila Susanne Vars, tel. 977 54 102