Sametingets budsjett 2015_Sametingsrådets forslag til innstilling.pdf 984,37 kB
Jagi 2015 bušeahttaevttohusain háliida Sámediggeráđđi áŋgiruššat boahtteáiggiin ja min oktasaš kulturárbbiin. – Min bušeahttaevttohusas mii leat earret eará válljen vuoruhit sámi mánáid oahpponeavvuid, ja viidáset ovddidit min museaid, dadjá sámediggeráđđi Ann-Mari Thomassen.
Sámediggeráđđi háliida ealli sámi servodagas, mas giella geavahuvvo buot arenain, mas mis leat nana sámi ásahusat ja máŋggabealat kultureallin. Jagi 2015 bušeahttaevttohusain mii joatkit dan barggu ahte nannet sámi servodaga geađgejuolggi.
Sámediggeráđđi Ann-Mari Thomassen váldá ovdan guokte áŋgiruššansuorggi sámediggeráđi jagi 2015 bušeahttaevttohusas.
Boahtteáigi
-Buot ovddimusat mii leat válljen áŋgiruššat iežamet boahtteáiggiin. Go mii vuoruhit mánáid oahpponeavvuid, sihke prentejuvvon ja digitála, de mii váikkuhit dasa ahte min mánát ožžot dásseárvosaš gieđahallama ja besset geavahit sámi skuvlagirjjiid. Dat lea hui deaŧalaš giela boahtteáigái, ja mánáid ovdáneapmái. Mii eat čoavdde buot dáinna juolludemiin, muhto sámediggeráđđi háliida váldit ovddasvástádusa go stáhta beahttá, dadjáThomassen.
Sámediggeráđđi evttoha juolludit 20, 1 miljon ruvnno oahpponeavvoráhkadeapmái. Dat lea 2,5 miljon ruvdnosaš lassáneapmi.
Oktasaš kulturárbi
-Dasto leat mii válljen áŋgiruššat iežamet oktasaš kulturárbbiin. Oktasaš sámi kulturárbi lea rikkis, muhto hui ollu das lea čihkkojuvvon arkiivvaide dahje kealláriidda. Mii háliidit vuoruhit sámi museaid go lea hui deaŧalaš ahte min kulturárdnii ráhkaduvvojit gelbbolaš lanjat ja visttit gos buohkain lea vejolašvuohta fitnat. Kulturárbbi bokte mii duddjot Sámi boahtteáigái. Sámi museat leat guhkás bázahallan dáža museaid ektui ekonomalaš ovdáneamis, ja dát lea mielde njulgemin dan bonjuvuođa, dadjáThomassen.
Sámediggeráđđi evttoha juolludit 31, 6 miljon ruvnno sámi museaide. Dat lea 3, 8 miljon ruvdnosaš lassáneapmi.
Go ráđđehus lea čuohppan 6 miljovnna vuođđoealáhusaide, de dat lea dagahan bušeahttaproseassa gáibideaddjin.
-Dat mearkkaš 6 miljovnna uhcit vuođđoealáhusaide sámi guovlluin, ja lea dieđusge hui váigat, čilge sámediggeráđđi Ann-Mari Thomassen.
Sámediggeráđđi háliida dál bovdet eará bellodagaid ja listtaid Sámedikki govda ovttasbargui bušeahtain, ja sávvá ahte maiddái Sámediggái gáržžes jagis galgá leat vejolaš juksat bušeahttasoahpamuša mii boahtá buorrin sámi servodahkii.
Sámediggeráđđi Ann-Mari Thomassen dadjá ahte sámediggeráđđi ovttas plána- ja finánsalávdegottiin vuolgá Stuorradiggái álgogeahčin skábmamánu muitalit sámi servodaga dárbbuid birra.
Eanet dieđuid: Sámediggeráđđi Ann-Mari Thomassen, 900 57 123
Dá lea sámediggeráđi 2015 bušeahttaárvalus: