Sámediggeráđđi juolluda 850 000 ruvnnu doarjjan Nordnorsk Reiseliv AS:ii prošektii Sámi Mátkeealáhus 2.0. Prošeakta galgá loktet sámi mátkeealáhusfitnodagaid gelbbolašvuođa ja eanedit daid buktagiid ja márkanosiid.
Sámi Mátkeealáhus 2.0 lea dan Sámi Mátkeealáhus prošeavtta joatkka maid Origo Nord lea jođihan áigodagas 2012-2015.
-Dat mii lea ođas dán joatkimis, lea ahte sámi mátkeealáhussuorgi dás čadnojuvvo dálá mátkeealáhusbirrasii ja nu beassá ávkkástallat ásahuvvon fierpmádagain, alla mátkefágalaš gelbbolašvuođain ja nana vuovdalankanálain mii sáhttá lokte juohke fitnodaga prošeavttas, dadjá sámediggeráđđi Silje Karine Muotka.
NordNorsk Reiseliv AS (NNR) vuovdala Davvi-Norgga mátkemearrin našunálalaččat ja riikkaidgaskasaččat. Fitnodagas leat 15 bargi kantuvrrain Romssas, Álttás ja Bådåddjos.
Prošeavtta Sámi Mátkeealáhusa 2.0 mihttomearri:
«Sámi kultuvra ja historjá galgá leat váldosivvan dasa ahte vuolgit Davvi-Norgii luopmomátkái, ja dakko bokte ahte eanebut háliidit muosáhit Davvi-Norgga sámi kultuvrra geažil, de dat galgá šaddat vuođđun birrajagi barggolašvuhtii»
Sámi Mátkeealáhus 2.0 galgá leat rabas fierpmádat mii fállá gealbudeami buohkaide geat háliidit háhkat ođđa máhtu. Adnojuvvo deaŧalažžan ahte buot fitnodagat ja eará instánssat main lea erenoamáš beroštupmi fágasuorggis, ožžot fálaldaga searvat rabas čoahkkanemiide nu go semináraide, kurssaide ja konferánssaide. Dakkár fitnodagat dahje ásahusat mat eai leat mielde prošeavttas, fertejit máksit ieža dakkár lágidemiide searvama ovddas.
Mátkeealáhusfitnodagat lullisámi guovlluin galget oažžut saji Sámi Mátkeealáhussii 2.0. Sámediggeráđđi Silje Karine Muotka dadjá ahte mátkeealáhusáŋgiruššamat sámi kultuvrrain fertejit leat vuođđuduvvon eaktivuhtii ja jáhkehahttivuhtii. – Olles prošeavttas ferte leat sáhka eakti ja jáhkehahtti sámi mátkeealáhusbuktagiin, dadjá Muotka.
-Sámi mátkeealáhusas lea buorre vejolašvuohta šaddat ollu stuorát ealáhussan sámi guovlluin go dál. Mii dárbbašit eanet fidnolaš sámi mátkeealáhusoassálastiid geat fállát eakti ja buriid buktagiid maid jearahit riikkaidgaskasaš mátkeealáhusmárkanis, dadjá Muotka.
Eanet dieđuid addá: Sámediggeráđđi Silje Karine Muotka, 984 87 576
Loga eanet dás:
http://www.sametinget.no/Naeringer/Variert-naeringsliv/Fornyet-satsing-paa-samisk-reiseliv