Sámediggeráđđi evttoha ođđa áŋgiruššama sámi mátkeealáhusprošeavtta bokte mas leat ovddideapmi, márkanfievrrideapmi ja fierpmádathuksen sámi mátkeealáhusfitnodagaid gaskkas. Ođas dás lea dat ahte máttasámi mátkeealáhusat galget maiddái oažžut vejolašvuođa searvat lassánan mátkeealáhusovddideapmái davvin dán prošeavtta bokte.
- Sámi mátkeealáhusain lea stuorra vejolašvuohta ja mis leat juo máŋga ovdamearkka fitnodagain mat leat lihkostuvvan mátkeealáhusáŋgiruššamiin. Jos galgat geavahit vejolašvuođaid viidáseappot sámi mátkeealáhusain, de dárbbašit mii vel eanet sámi mátkeealáhusaktevrraid mat leat gergosat váldit vuostá jearaldaga ja sáhttet fállat buktagiid máilmmi dásis, dadjá sámediggeráđđi Silje Karine Muotka.
Sámedikki dievasčoahkkima oktavuođas Oslos čakčamánu 21. – 25. b. áigu Sámediggeráđđi ovdan bidjat evttohusa movt viidáseappot áŋgiruššat sámi mátkeealáhusaiguin. Jagi 2012 rájes lea Sámediggi ovttasráđiid Romssa, Norlándda ja Finnmárkku fylkkagielddaiguin, Innovašuvdna Norggain ja VRI:in leamaš mielde ruhtadeamen ovddidanprošeavtta Sámi Mátkeealáhusat Davvi-Norggas Kunnskapsparken Origo AS jođihemiin. Dál lea prošeakta goalmmát ja maŋimuš jagis ja sámediggeráđđi evttoha danne joatkit áŋgiruššamiin.
- Mun lean hui movtta go olles 37 sámi mátkeealáhusaktevrra leat váikkuhan prošeavtta ja sámediggeráđđi oaivvilda ahte sámi mátkeealáhusat lea hui deaŧalaš áŋgiruššansuorgi ovddos guvlui. Mun áiggun geavahit vejolašvuođa rámiidit prošeaktabarggu maid Origo AS lea dahkan, mas prošeaktajođiheaddji Beate Juliussen leamaš njunnošis, dát bargu lea deaŧalaš vuođđogeađgi barggus mainna mii dál joatkit, dadjá sámediggeráđđi Muotka.
Danne evttoha sámediggeráđđi joatkit dán barggu čuovvolanprošeavttain. Mii fertet čielggadit máŋga beali, earret eará vejolašvuođa movt nannet ovttasbarggu sámi mátkeealáhusaktevrraiguin Ruoŧa bealde ja olles sámi guovllus dadjá Muotka. Sámediggeráđđi váldá ovdan maiddái dan barggu mii lea dahkkojuvvon Ruoŧa bealde Visit Sápmi ja Sápmi experience ektui. – Mii dárbbašit joatkit barggu ráhkadan dihte vuođu eanet bissovaš struktuvrraide márkanbarggu ja mearrebáikeovddideami ektui, dadjá Muotka.
Dá lea duogáš dasa manne sámediggeráđđi evttoha barggu joatkima čuovvu ovddidanprošeavttain sámi mátkeealáhusaid várás ja sámediggeráđđi evttoha ahte Davvi-Norgga mátkeealáhusat OS mii lea riikaoassefitnodat márkanfievrrideami ja mátkeealáhusbuktagiid vuovdimis Davvi-Norggas, jođiha barggu.
– Dán muttus čadnojuvvojit sámi mátkeealáhusfitnodagat lávgadeappot hárjánan mátkeealáhusbirrasiidda, main lea ásahuvvon márkanapparáhta gos dat ovddidit buktagiiddiset ja fitnodagaid sámi mátkeealáhusaid jearaldaga mielde.
- Sámediggeráđđái lea deaŧalaš ahte Sámediggi ja sámi mátkeealáhusat ieža leat bidjamin eavttuid sámi mátkeealáhusaid ovddideapmái. Prošeavtta Sámi mátkeealáhusat joatkin ja nannen, ja dasto lávgadeappot ovttasbargu DavviNorgga mátkeealáhusain leat deaŧalaččat dán muttus, dadjá Silje Karine Muotka sámediggeráđis, son vuordá mielas gelddolaš digaštallama sámi mátkeealáhusaid birra Sámedikki dievasčoahkkimis Oslos duorastaga čakčamánu 24. b.
Gulahallan:
Sámediggeráđđi Silje Karine Muotka tel: 984 87 576