Sámediggeráđđi lea dál juolludan doarjaga sámi girjjálašvuhtii 2015:s. Sámediggái bohte ohcamat measta 15 miljon ru ovddas čáppagirjjálašvuođa doarjjaortnegii, ja ollislaš juolludusrámma lea 6,3 miljon ru.
- Sámi girječállit ja lágádusat buktet ollu buriid prošeavttaid, ja kvalitehta hui ollu prošeavttain duođašta ahte girjjálašvuohta lea lieđđumin. Dán jagi leat mii erenoamážit válljen vuoruhit girjjálašvuođa nuoraide, ja leat juolludan doarjaga sihke ođđa románaid, diktagirjjiid, govvasárggusráidduid ja fágagirjjiid almmuheapmái, cealká ráđđelahttu Henrik Olsen.
Ráđđelahttu Olsen deattuha ahte sii leat válljen áŋgiruššat girjjálašvuođain boarráset mánáid ja nuoraid várás, sihke originálagirjjálašvuođa ja jorgaleami, danne go oaidnit ahte lea stuorra dárbu girjjálašvuhtii sámegillii dán ahkejovkui.
- Ođđa sámi nuoraidgirjjálašvuohta váilu ja min mielas lea hui deaŧalaš ahte maiddái sámi mánáide ja nuoraide lea buorre girjjálašvuođa fálaldat sin iežaset eatnigillii.
Eanet máttasámi girjjit
Earret eará lea Davvi-Trøndelága fylkabibliotehkii juolluduvvon 420 000 ruvdnosaš ohcan bivnnuhis mánáidgirjjiid jorgaleapmái máttasámegillii.
- Davvi-Trøndelága fylkkagielddas lea ollu jagiid leamaš fokus oažžut girjjiid máttasámegillii, ja dát áŋgiruššan lea juoga maid mii leat válljen doarjut sihke 2014:s ja dán jagi, cealká ráđđelahttu Henrik Olsen.
2015:s lea oktiibuot juolluduvvon 6 302 000 ru sámi girjjálašvuhtii, ja juolluduvvon ohcamiid gaskkas leat girjeprošeavttat sihke davvi-, julev- ja máttasámegillii.
Eanet dieđuid addá:
Ráđđelahttu Henrik Olsen, tel. 907 75 219