Sámediggeráđđi lea vuossárgga Gáivuonas ja almmuha dan oktavuođas ođđa prográmma sámi kulturealáhusaktevrraid várás geat háliidivčče eallit dáidda- ja kulturbargguin. Prográmmas lea sadji 12 arvvalaš oasseváldái Romssas, ja dat álggahuvvo skábmamánus Davviálbmogiid guovddážis.
- Davvi-Romssas lea gelddolaš historjá gos lea buorre ealáhushutkan. Odne dat lea okta min deaŧaleamos sámi kulturealáhuskatalysáhtoriin, dadjá sámediggepresideanta Aili Keskitalo.
Birrasiid nugo Halti ealáhusgárdi, Davviálbmogiid guovddáš, máŋga festivála ja mátkeealáhusprošeavtta bokte lea šaddan buorre ealáhushutkanbiras Davvi-Romssas
Dál leat dán guovllus ásahan máŋga unnit fitnodaga mat vuođđuduvvet kultur- ja kulturvuđot ealáhusaide. Sámediggi sávvá dál ahte šattašedje eanet ceavzilis bargosajit kultur- ja kulturvuđot ealáhusain Romssas
Dáhtu birra
Fitnodatovddidanprográmma bokte, mii erenoamážit lea láhččojuvvon kulturealáhusaide ja daid mihtilmasvuhtii, besset čeahpes sámi aktevrrat buoridit gelbbolašvuođa das movt doaimmahit gánnáhahtti kulturfitnodaga. Aktevrrat besset bargat jurddaovddidemiin, fitnodaga ásahemiin, dahje ovddidemiin ja strategiijain. Sámediggi lea bivdán Kreativ Industri nammasaš fitnodaga čađahit prográmma man namma lea Dáhttu. Dáhttu1 lea juo álggahuvvon Finnmárkkus man oktavuođas 12 arvvalaš kulturealáhusaktevrra leat juo olles leavttuin ovddideamen alcceseaset fitnodaga.
Kulturealáhusaktevrrat geain lea beroštupmi sáhttet váldit oktavuođa Kreativ Industri nammasaš fitnodagain, maŋimustá 24.09, post@kreativindustri.no
Mii sámi kulturealáhus lea