Árvoháhkanprográmma

Lotnolasvuohta iešguđetge ealáhusaid gaskkas lea vierru mii lea leamašan áibbas dábálaš sámi servodagain. Dákkár ealáhusheiven dagaha vejolažžan biđget riska máŋgga ealáhusdoaimmaide gaskkas. Bearrašat sáhttet lasihit dinenvejolašvuođaid go ožžot dietnasa máŋggaid ealáhusdoaimmain.  Ollu sámeguovlluin váilot resurssat nugomat smávva eatnamat, smávva earit sihke guolástanealáhusas ja eanandoalus. Buohtalastin eará ealáhusaiguin dagaha vejolažžan ain orrut dakkár guovlluin gos eai livčče doarvái valljodagat áidnaealáhusas birget.

Prográmma álggahuvvui jagi 2008 ja doaibmabijut árvaluvvojit jahkásaččat Sámedikki bušeahtas. Prográmma ekonomalaš rámma lea 8,5 miljovnna ruvnno.

Buohtalasealáhusaid ja sámi mátkeealáhusaid árvoháhkanprográmma mihttomearrin lea:

• Buoridit álggaheddjiid gelbbolašvuođa
• Nannet duoji neavvunbálvalusa
• Rekruteret nuoraid duodjeealáhussii
• Buoridit rámmaeavttuid meahcceealáhusaide
• Čalmmustahttit buohtalasealáhusdoaimma
• Lasihit ahtanuššama sámi mátkeealáhusain
• Oaččuhit mearraealáhusaid lunddolaš oassin sámi mátkeealáhusain
• Lasihit njuorjobivddu vai báikkálaš guollenálli buorrána.