Sámediggeráđđi ásaha resursajoavkku mii galgá čuvget sámi meahccegeavaheami ja movt dálá hálddašeapmi lea heivehuvvon meahcásteddjiid dárbbuide. Resursajoavkkus leat meahcásteaddjit iešguđet guovlluin.
Sámediggeráđđi galgá ođasmahttit sámedikki areála- ja birasdieđáhusa. Ráđđi háliida váldit mielde iešguđet ealáhusaid ja fágabirrasiid dieđáhusbargui. Dan oktavuođas ásahit resursajoavkku mii galgá doaibmat bargojoavkun ja buktit iežas evttohusaid politihkaovddideapmái mas lea sámi meahcásteami birra.
Hástalus
-Lea hástalussan hálddahusas ja hálddahussii ahte árbevirolaš ávkkástallan ruovttudollui ii sáhte gohčoduvvot”ealáhusdoaimmaheapmin” seammás go kultuvrralaš mearkkašupmi lea eanet go dušše “astoáiggedoaimmas”, lohká sámediggeráđđi Thomas Åhren.
Ávkkástallan lea oassin ruovttudoalu luonddubuktagiin sámi giliin. Dát lea maid ávkkástallan mii lea lassin obbalaš ruovttudoalloekonomiijii ja mii lea hui dehálaš, ja muhtin háve vealtameahttun olbmuid obbalaš dietnasii ja vejolašvuhtii ássat dákkár guovlluin.
-Sámi meahcásteapmi galgá leat vuođđun meahci almmolaš hálddašeamis. Dieđáhusas galgat digaštallat movt sáhttá váldit vára árbevirolaš meahcásteamis ruovttudoalu geavaheapmái ja árbevieruid seailluheami areálaid hálddašeamis, almmá gohčodeames dan ealáhusdoaimmaheapmin mii geahčaduvvo ekonomalaš árvvuid mielde. Dieđáhus galgá čalmmustahttit árbevirolaš meahcásteami mearkkašumi ja defineret movt Sámediggi berre viidáseappot bargat dáinna áššiin boahtteáiggis, lohká Åhren.
Resursajoavkku mandáhtta
Evttohusat resursajoavkkus galget leat oassin máhttovuođus Sámedikki areála- ja birasdieđáhusas. Lávdegoddi galgá maid ovddidit oainnuid materiála birra maid Sámediggi hábme meahci birra dieđáhusbarggu oktavuođas.
-Resursajoavku sáhttá buktit cealkámušaid ja kommentáraid álgoevttohussii mat leat hábmejuvvon dieđáhusbarggu oktavuođas, gos váldit ovdan meahcceresurssaid geavaheami, hálddašeami ja seailluheami, lohká Åhren.
Resursajoavkkus leat dát mielde:
Johan Ingvald Hætta - Sámi bivdo- ja meahcástansearvi, Guovdageaidnu
Nancy Charlotte Porsanger, NBR, Deatnu
Jan Erik Henriksen, Alta JJF, Áltá
Sigvald Persen, Mearrasámiid gealboguovddáš, Billávuotna
Unni Fjellheim, Fjellvilt AS
Siss Heidi Hansen, Molta AS, Gádde-Iččát
Steinar Pedersen Deanus eret lea nammaduvvon resursajoavkku čállin.
Plána mielde galgá dieđáhus buktojuvvot ovdan Sámedikki dievasčoahkkima meannudeapmái geassemánu 2016. Resursajoavku galgá buktit iežas cealkámušaid ovdal guovvamánu 2016.
Háliidit cealkámušaid
Sámediggeráđđi háliida cealkámušaid sámedikki areála- ja birasdieđáhussii. Mihttun dieđáhusain lea nannet Sámedikki politihka areála- ja birashástalusaid gažaldagas mat bohtet čuožžilit sámi servodagas boahtteáiggis.
Ráđđi pláne maid eanet gulahallančoahkkimiid sámi báikegottiiguin ja organisašuvnnaiguin álggus 2016. Vuosttaš oassin barggus, de galgá hábmejuvvot artihkalčoakkáldat áigeguovdilis fáttáid birra areála- ja biraspolitihkas.
Eanet dutkit leat bovdejuvvon buktit artihkkala mii ovdanbuktojuvvo fágasemináras skábmamánu 25. ja 26.b.2015.
Loga eanet:
http://www.sametinget.no/Miljoe-areal-og-kulturvern/Areal/Sametingsmelding-om-areal-og-miljoepolitikk-Invitasjon-til-innspill
Mearkkašumiid sáhttá sáddet deike: biras@samediggi.no
Eanet dieđuid oaččut: Sámediggeráđis Thomas Åhren, 908 39 663