Sámediggeráđđi dovddasta ahte dálkkádatáitta lea duohta ja ahte olbmováikkuhan dálkkádatrievdamat leat okta min áiggi stuorámusa hástalusain. Stuorradikkis lea leamaš šiehtadallamat govda dálkkádatsoahpamuša hárrái. Geassemánu 1. b. boatkanedje šiehtadallamat.
- Šállošan go dálkkádatšiehtadallamat Stuorradikkis leat boatkana. Norga dárbbaša govda dálkkádatsoahpamuša nana vuolggasadjin bevttolaš dálkkádatdoaibmabijuide ja mii sihkkarastá ovttamielalašvuođa dáid doaibmabijuid boahttevaš ruhtadeami hárrái. Dan ánssášit min boahtte buolvvat, cealká sámediggeráđđi Vibeke Larsen.
Dálkkádatrievdamat gusket duođas álgoálbmogiidda go álgoálbmogat dávjá ellet lahka luonddu ja nu doppe gos dálkkádatrievdamat čuhcet ovddimusat. Dát guoská erenoamážit álgoálbmogiidda Árktisis gos dálkkádagat rivdet johtilepmosit.
- Dálkkádatrievdamat lea máilmmiviidosaš váttisvuohta, ja lea ge máilmmi ovddasvástideaddji jođiheddjiid duohken mearridit riikkaidgaskasaš šiehtadusaid mat dagahit ahte máilbmi sáhttá gieđahallat daid dramáhtalaš dálkkádatrievdamiid maid mii dál vásihit, cealká sámediggeráđđi Larsen.
Ráđđelahttu Vibeke Larsen čujuha viidáseappot dasa ahte seammás ferte čađahit máŋga doaibmabiju nationála dásis vuolidan dihtii dálkkádatgássaid luoitimiid ja ovddidit teknologiija nu ahte boahtteáigi šaddá dakkár servodat mas luitojuvvojit uhccán dálkkádatgássat.
- Ávžžuhan Stuorradiggebellodagaid máhccat šiehtadallanbeavdái dainna duohta ulbmiliin ahte juksat ovttamielalašvuođa gudneáŋgiris dálkkádatsoahpamuša hárrái, dadjá ráđđelahttu Vibeke Larsen loahpas.
Oktavuohta:
Sámedikki ráđđelahttu Vibeke Larsen, tlf. 941 30 116