Sámediggi lea juolludan 457 000 ruvnno Skodi Reinkjøtt:ii Kárášjogas, oastit mašiinnaid maiguin buvttada buktagiid bohccobierggus. Sámediggeráđđi Thomas Åhrén lohká ahte bohccobierggu jearahit ollu Norggas, ja danin lea márkanvuođđu maiddái smávit dihtomárkanfitnodagaide dego Skodi Reinkjøtt.
Skodi Reinkjøtt áigu oastit mašiinnaid mat álkidit ja geahpidit barggu go smávve daid. Dál čuhppojuvvo ollu gieđaiguin. Dát mielddisbuktá ahte bargu manná njozet ja seammás dat mielddisbuktá ollu lossa rahčamiid.
Fitnodat lea smávit bearašfitnodat Kárášjogas mii bargá boazodoaluin. Sullii guokte jagi áigi álggahii fitnodat maiddái bohccobierggu viidásetbuvttademiin ja vuovdimiin.
Fitnodat vuovdá bohccobiergobuktagiid nu go bohccorulla, sáltebierggu, cáhppojuvvon bierggu, marinerejuvvon biffa, gissojuvvon čoarbbealbierggu, vuoivvasbiffa, savvodeahki, čielgečaskáid, málesbierggu jna. Bierggu váldá iežas ealus.
Sámediggeráđđi Thomas Åhren lohká ahte báikkálaš fitnodagat berrejit ovttasbargat.
-Lea dehálaš ávkkástallat nubbi nuppi nanusvuođas ja gelbbolašvuođas nu ahte buvttadeaddjit oktiibuot olahit ovdamuniid. Mus lea jáhkku dasa ahte go máŋggas áŋgiruššet ja oktiiheivehit strategiijaid, de gilvalandili dihte váikkuha dát ahte buohkaide lea ávkin, lohká Sámediggeráđđi Thomas Åhren.
-Skodi Reinkjøtt lea fitnodat mas leat buorit boahtteáiggevejolašvuođat bohccobierggu buvttadeamis. Fitnodat lea ráhkadan máŋga buktaga bohccobierggus main leat eanet vejolašvuođat, lohká Åhren.
Eanet dieđut: Sámediggeráđđi Thomas Åhren, 908 39 663