Henrik Olsen (foto: Åse M.P. Pulk/Sámediggi)
– Midjiide lea hui váttis bisuhit dan dási mii mis lea leamaš kulturbušeahtas, dan sivas go ráđđehus ii joatkke daid ruđaid maid mii leat ožžon maŋimus viđa jagis Stoltenberg II Kulturloktema bokte. 10 miljon ruvnnu leat dál jávkan stáhtabušeahtas ja dat váikkuha ahte šaddet hirbmat garra vuoruheamit mat gáržžidit kulturbušeahta hui garrasit. Mii ballat duohtanjiedjama kulturbušeahtas, dadjá bušeahttaovddasvástideaddji ja sámediggeráđđi Henrik Olsen.
Dan ávvojagis mii dál fargga nohká, lea sámi dáidda ja kultuvra duođai oidnon ja ožžon fuomášumi riikkaidgaskasaččat. Sámediggeráđđi ballá ahte bohtet garra dávástusat go bušeahttabargu lea dahkkojuvvon ja sii eai nagot čuovvulit dán positiivva soju.
– Lea vuostálasvuohta das go ráđđehus vállje čuohppat aiddo kulturdoarjaga, dál go sámi dáidda ja kultuvra viimmat lea ožžon stuorrá fuomášumi riikkaidgaskasaččat. Eahpidan ahte midjiide lea vejolaš láhčit sullasaš áŋgiruššamii boahtte jagi, go sii leat čuohppan nie ollu, dadjá Olsen.
Hirbmat garra vuoruheamit
Ráđi mielas lea dattetge buorre go sámi gielat, oahpponeavvut, oahppoplánabargu ja sámi vistesuodjalus leat vuoruhuvvon. Maiddái sámi mánáidgárddit leat bušeahttavuoitit boahtte jagi, go juolludeamit galget váikkuhit dasa ahte sámi mánát ožžot iežaset giela ja kultuvrra ovddiduvvot mánáidgárddis juo.
Muhto go ollu dain ruđain mat gullet lassáneapmái leat merkejuvvon ruđat, de ferte ráđđi hirbmat garrasit vuoruhit barggus bušeahtain.
– Mii áigut dán boahtte guokte vahku bargat Stuorradikki ektui geahččalan dihtii oažžut rievdaduvvot čuohppamiid stáhtabušeahttaevttohusas. Dat ii leat doarvái buorre, danne mii áigut dál bidjat ollu barggu dasa ahte oažžut oktavuođa rivttes stuorradiggepolitihkkáriiguin ja čilget sidjiide min hástalusaid, dadjá Olsen. Son maid jáhkká ahte finánsaministtar Siv Jensen maŋŋá maŋimus beivviid garra digaštallamiid álgoálbmotkultuvrraid birra, čájeha áddejumi daid hástalusaid ektui mat našuvnna iežas álgoálbmogis leat.