Stáhta fálaldagas eanadoallošiehtadallamiin evttohuvvo geahpedit juolludemiid Sámediggái njeljiin miljon ruvnnuin. sámediggeráđđi Silje Karine Muotka ballá ahte dakkár uhcideamis lea stuorra váikkuhusat sámi guovlluid eanadollui.
- Njealji miljon ruvdnosaš geahpedusas leat stuorra váikkuhusat Sámedikki áŋgiruššamii sámi eanadoaluin, dadjá beahttašuvvan sámediggeráđđi Silje Karine Muotka.
Sámediggi lei bures jođus doaibmavisttiid ođasmahttimiin, ja Muotka ballá dán barggu bisánit jus evttohuvvon geahpedus čađahuvvo. Son deattuha viidáseappot ahte stáhta fálaldat ii soaba gustovaš davveguovlopolitihkain.
- Lassin geahpedussii juolludemiin Sámediggái evttoha stáhta maiddái geahpedusa áŋgiruššamis árktalaš eanadoaluin. Das lea negatiiva váikkuhusat sámi guovlluid eanadollui. Ii ge árktalaš eanadoalu vulos vuoruheapmi soaba mearriduvvon davveguovlopolitihkain, dadjá Muotka.
Eanadoallu lea guhká leamaš okta sámi guovlluid nannoseamos ealáhusain. Erenoamážit smávvadállodoallu lea deaŧalaš sámi kultuvrra ja sámi giliid vuođu bisuheapmái. Stáhta háliida stuorát dállodoaluid dakko bokte ahte loktet konsešuvdnarájiid earret eará mielkebuvttadandoaluin. Dáinna fálaldagain stáhta oide industriijaeanadoalu bearašeanadoalu ovddabeallái.
Sámediggeráđđi Silje Karine Muotka mielas dát sáhttá čuohcat garrasit sámi eanadollui, ii dušše dán jagi, muhto máŋggaid jagiid ovddasguvlui.
- Dákkár rievdademiin sáhttá Davvi-Norga šaddat vuoittáhallin dán jagáš eanadoalu loahppameanuin. Mun balan ahte sámi guovlluid eanadoallu ii birge dán gilvvus, loahpaha Muotka.
Fálaldat lea dáppe: http://www.regjeringen.no/upload/LMD/Vedlegg/Statens_tilbud_2014.pdf
Gulahalli:
Ráđđelahttu Silje Karine Muotka, tel. 984 87 576