-Sámediggeráđđi lea mearridan juolludit viidáset doarjaga Duodjeinstituhttii nu ahte sáhttá viidásetfievrridit duodjebagadalliortnega Gaska- ja Nuorta-Finnmárkkus, lohká sámediggeráđđi Silje Karine Muotka.
-Sámediggeráđđi lea ollu jagiid dorjon Duodjeinstituhta barggu ásahit duodjebagadalliid iešguđet báikkiin. Dat lea mielddisbuktán ahte mis dál leat ollu 50% virggit, earret eará lea mis bagadalli Deanjás mii galgá gokčat Romssa fylkka, ja Vuopmegeaži bagadalli bargá Romssa/Nordlándda fylkkaráji bakte. Snoasas ruhtadit mii olles virggi mii juogaduvvo guovtti bagadalli gaskka – soai gokčaba lullisámi guovllu. Dáidda virggiide addá Sámediggi fásta njuolggodoarjaga.
Dasa lassin lea dál Duodjeinstituhtas leamaš prošeakta mas leat guokte 50% virggi Gaska-Finnmárkkus ja Nuorta-Finnmárkkus ja daidda leat mii sámediggeráđis čoahkkimis ikte mearridan ahte mii doarjut viidáseappot 2015:s, 1 090 000 ruvnnuin, lohká Muotka. Sámediggeráđđi háliida ahte bagadallivirggit galget earret eará váikkuhit ja movttiidahttit dasa ahte duodjái boahtá beroštupmi ealáhussan, lohká Muotka.
-Sámediggi vuordá ahte dát bagadallandoaibma mielddisbuktá eanet ásahemiid duodjeealáhussii, lohká Muotka.
-Sámediggeráđđi doarju barggu sihkkarastit duodjebagadalliid. Dát lea viiddis áŋgiruššan Sámedikki bealis ja mii fertet váldit doaimma ásahit duodjebagadalliid veahážiid mielde, lohká Silje Karine Muotka.
Gulahallanolmmoš: Sámediggeráđđi Silje Karine Muotka, tlf 98 48 75 76