- Lean erenoamážit fuolastuvvan daid váikkuhusaid geažil maid dát politihkka buvttiha guovllu máttasámi álbmogii, dadjá sámediggeráđđi Mariann Wollmann Magga.
Hedmárkku ja Oslo, Akershusa ja Østfoldda boraspirelávdegottit mearridedje vuos addit lobiid báhčit gumppiid olggobealde gumpeavádaga. Dat mearrádus guoskkai maiddái báhčimii nu gohčoduvvon Osdalvalvvi gumppiid mat eatnašat lea olggobealde gumpeavádaga. Maŋŋá dahke lávdegottit mearrádusa gumppiid báhčima hárrái olggobealde gumpeavádaga. Dálkkádat- ja birasministtar Vidar Helgesen almmuhii 20.12.2016 ahte dat gumpebivdu maid lávdegottit leat mearridan, eai galgga čađahuvvot.
- Lean hui beahttašuvvan go ministtar badjelgeahččá mearrádusaid maid boraspirelávdegottit leat dahkan, mii fas lea dagahan ahte buot Regiovnna 5 Hedmárkku boraspirelávdegotti lahtu ja golmmas regiovnna 3 Opplándda lahtu leat loahpan doaimmaideaset, dadjá Wollmann Magga.
Su miela gártá Dálkkádat- ja birasministara láhtten ain eanet áddemeahttumin go Stuorradiggi 2016 giđa celkkii ahte sii áigot geahpedit guohtunealáhusaid noađuhemiid gumpemáddodaga hálddašemiin.
- Ministtar orui jaska máŋga mánu dan botta go boraspirelávdegotti dahke bargguset Birasdirektoráhta neavvaga vuođul, ja de hirpmástuhttá Stuorradikki báhčinbissehemiin. Dál ferte ráđđehus váldit badjelasas ovddasvástádusa das ahte čađahit Stuorradikki boraspiresoahpamuša mas boahtá ovdan ahte galget čađahuvvot dárbbašlaš doaibmabijut sihke boraspirehálddašeamis ja boazodoalu dainna áigumušain ahte sihkkarastit máttasámi boazodoalu dili, dadjá Wollmann Magga.
Sámediggeráđđi lea máŋgga oktavuođas cealkán ahte ii galgga leat gumpe sámi guovlluin.
- Balan ahte Dálkkádat- ja birasministara láhtten boraspirehálddašeamis dagaha ahte dat aiddo dáhpáhuvvá, daid váikkuhusaiguin maid dat mielddisbuktá máttasámi álbmogii lahka gumpeavádaga, dadjá Wollmann Magga.
Dat bealli ahte Ráđđehus suovvá gumppiid ásahit beassebirradaga olggobealde gumpeavádaga, dagaha ahte gumpevalvvit lahkonit sámi boazoguovllu. Sámediggeráđđi ballá ahte bohtet eanet vádjaluseallit dán guvlui, earret eará Osdala beassebirradagas ja ahte dat nannešii daid váikkuhusaid maid mii leat vásihan das ahte gumpe lea boazoguohtunguovlluin dahje dain lahkosis.
- Máttasámi álbmot lea juo áitojuvvon máŋgga dáfus. Dat guoská sihke giela, kultuvrra ja servodateallima dáfus. Máttasámi guovlluid boazodoallu lea deaŧalaš kulturguoddi ja das lea stuorra mearkkašupmi máttasámi giela gáhttema ja nannema ektui. Seammás lea boazodoallu daid bearrašiid birgenláhki, geat doaimmahit dán ealáhusa. Sámediggeráđđi oaivvilda ahte lea áibbas dohkkemeahttun ahte lea gumpe guovlluin gos lea sámi boazodoallu, dadjá Wollmann Magga.
Dálkkádat- ja birasministtar lea dál mearridan ahte gumppet galget merkejuvvot, earret eará Osdala beassemáddodaga gumppet, mat eatnašat leat olggobealde gumpeavádaga, ja sámediggeráđi Wollmann Magga orru leamen nu ahte ministtar dáinna lágiin geahččala dahkat lobálažžan ahte leat gumppet olggobealde gumpeavádaga.
- Sámediggeráđi gáibádus lea ahte boraspirelávdegottiid mearrádus gumpebáhčimiid ektui, galgá čađahuvvot ja de ii sáhte geahččalit dan vihpadit dainna lágiin ahte merkegoahtit gumppiid, dadjá Wollmann Magga.
Loahpas sáhttá Magga muitalit ahte sámediggeráđđi lea bivdán čoahkkima stáhtaministariin digaštallat dan dohkkemeahttun dili mii lea čuožžilan boraspirehálddašeamis.
Eanet dieđut: sámediggeráđđi Mariann Wollmann Magga +47 977 02 350